ഹൈലൈറ്റ്:
- കര്‍ശനമായ ആരോഗ്യ സുരക്ഷാ നിയന്ത്രണങ്ങളോടെയായിരുന്നു പരിപാടികള്‍
- പങ്കെടുക്കുന്നവര്‍രണ്ട് ഡോസ് വാക്‌സിനും എടുത്തവരായിരിക്കണം
റിയാദ്: കൊവിഡ് നിയന്ത്രണങ്ങളുടെ ഭാഗമായി ഒരു വര്‍ഷത്തിലേറെയായി മുടങ്ങിക്കിടക്കുകയായിരുന്ന സംഗീതപരിപാടികള്‍ സൗദിയില്‍ വീണ്ടും ആരംഭിച്ചു. പ്രശസ്ത കുവൈറ്റ് ഗായകന്‍ നബീല്‍ ഷുഹൈല്‍, സിറിയന്‍ ഗായിക അസല നസ്‌റി എന്നിവരുടെ നേതൃത്വത്തിലായിരുന്നു ആദ്യ സംഗീതനിശ. രാജ്യത്ത് കൊവിഡ് വ്യാപനത്തില്‍ വലിയ കുറവുണ്ടായ സാഹചര്യത്തില്‍ നിയന്ത്രണങ്ങള്‍ക്ക് വിധേയമായി വിനോദ പരിപാടികള്‍ സംഘടിപ്പിക്കാന്‍ കഴിഞ്ഞ ആഴ്ച ജനറല്‍ എന്റെര്‍ടെയിന്‍മെന്റ് അതോറിറ്റി അനുവാദം നല്‍കിയിരുന്നു. അതിനു ശേഷം നടക്കുന്ന ആദ്യ സംഗീതപരിപാടിയായിരുന്നു വ്യാഴാഴ്ച രാത്രി റിയാദില്‍ നടന്നത്.
പ്രമുഖ സൗദി ഗായകന്‍ മുഹമ്മദ് അബ്ദുവിന്റെ നേതൃത്വത്തിലുള്ള സംഗീത നിശം ഇന്നലെ രാത്രി റിയാദില്‍ തന്നെ നടന്നു. കര്‍ശനമായ ആരോഗ്യ സുരക്ഷാ നിയന്ത്രണങ്ങളോടെയായിരുന്നു പരിപാടികള്‍.
സംഗീത പരിപാടിക്ക് നേതൃത്വം നല്‍കുന്ന ഗായകരും മറ്റു കലാകാരന്‍മാരും ഉള്‍പ്പെടെയുള്ളവര്‍ക്ക് പിസിആര്‍ നെഗറ്റീവ് സര്‍ട്ടിഫിക്കറ്റ് ഹാജരാക്കണമെന്നാണ് വ്യവസ്ഥകളിലൊന്ന്. പങ്കെടുക്കുന്നവരാവട്ടെ രണ്ട് ഡോസ് വാക്‌സിനും എടുത്തവരായിരിക്കുകയും വേണം. വാക്‌സിന്‍ എടുത്തവരാണോ എന്ന കാര്യം പ്രവേശന കവാടത്തില്‍ വച്ചു തന്നെ തവക്കല്‍നാ ആപ്പ് പരിശോധിച്ച് ഉറപ്പുവരുത്തിയാണ് ആളുകളെ അകത്തേക്ക് കടത്തിവിട്ടത്. സംഗീതാസ്വാദകര്‍ക്ക് വരുന്നതിനും പോകുന്നതിനുമായി പ്രത്യേക വഴികള്‍ സംഘാടകര്‍ സജ്ജമാക്കിയിരുന്നു.
Also Read: 
ഔട്ട്‌ഡോര്‍ പരിപാടിക്ക് സാധാരണ ശേഷിയുടെ 40 ശതമാനം ആളുകളെ പങ്കെടുപ്പിച്ച് പരിപാടി സംഘടിപ്പിക്കാമെന്നാണ് വ്യവസ്ഥ. ഔട്ട്‌ഡോറില്‍ നില്‍ക്കുന്നവര്‍ക്കായി 1.5 മീറ്റര്‍ അകലത്തില്‍ പ്രത്യേകം നിലത്ത് അടയാളപ്പെടുത്തണം. ഇന്‍ഡോര്‍ പരിപാടികളാണെങ്കില്‍ സാമൂഹ്യ അകലം പാലിച്ച് ഇരിപ്പിടങ്ങള്‍ തമ്മില്‍ 1.5 മീറ്റര്‍ അകലം വേണം. സന്ദര്‍ശകര്‍ക്കായി പ്രവേശന കവാടത്തിലും ടോയ്‌ലെറ്റുകളും സാനിറ്റൈസര്‍ ലഭ്യമാക്കുകയും വേണം. മാസ്‌ക് ധാരണം ഉള്‍പ്പെടെയുള്ള മറ്റ് കൊവിഡ് പെരുമാറ്റ്ചട്ടങ്ങളും കൃത്യമായി പാലിക്കണമെന്നാണ് നിയമം.
വിനോദ പരിപാടികള്‍ക്കുള്ള ടിക്കറ്റുകളുടെ വില്‍പ്പന ഓണ്‍ലൈന്‍ വഴിയാണ് നടത്തുക. പരിപാടി നടക്കുന്ന വേദിയില്‍ കൊവിഡ് ചട്ടം അനുസരിച്ച് പങ്കെടുക്കാവുന്നവരുടെ എണ്ണം കണക്കാക്കി മാത്രമായിരിക്കും ടിക്കറ്റുകള്‍ വിതരണം ചെയ്യുക. മുന്‍കൂട്ടി സീറ്റ് റിസര്‍വ് ചെയ്യാത്തവര്‍ക്ക് പ്രവേശനം അനുവദിക്കില്ല.
ആനപ്പിണ്ടവുമായി ബിജെപി പ്രതിഷേധം
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : concerts resume in saudi arabia
Malayalam News from malayalam.samayam.com, TIL Network
Podcast: Play in new window | Download