കൊച്ചി നാവികസേന ആസ്ഥാനത്ത് സുരക്ഷാ ജീവനക്കാരൻ വെടിയേറ്റ് മരിച്ച നിലയിൽ; അന്വേഷണം ആരംഭിച്ചു

കൊച്ചി: നാവികസേനാ അസ്ഥാനത്ത് സുരക്ഷാ ജീവനക്കാരൻ വെടിയേറ്റ് മരിച്ച നിലയിൽ. ഉത്തർപ്രദേശ് സ്വദേശി തുഷാർ അത്രി (19) എന്ന ഉദ്യോഗസ്ഥനെയാണ് മരിച്ച നിലയിൽ കണ്ടെത്തിയത്. ചൊവ്വാഴ്ച പുലർച്ചെയാണ് ഇയാളുടെ മൃതദേഹം കണ്ടെത്തിയത്. സംഭവത്തിൽ അന്വേഷണം ആരംഭിച്ചു.

വണ്ടിപ്പെരിയാറിലെ പീഡനം: കെട്ടിത്തൂക്കുന്നതിനിടെ കുട്ടി കണ്ണ് തുറന്നുവെന്ന് പ്രതി
ഇന്ന് പുലർച്ചെ നേവൽ ബേസ് കഠാരി ബാഗിലെ ഔട്ട് പോസ്റ്റിന് സമീപത്ത് നിന്നാണ് തുഷാറിൻ്റെ മൃതദേഹം കണ്ടെത്തിയത്. വെടിയേറ്റ് മരിച്ച നിലയിലായിരുന്നു. തുഷാർ ഉപയോഗിച്ചിരുന്ന എകെ 47 തോക്ക് ഉപയോഗിച്ചാണ് വെടിയുതിർത്തതെന്നാണ് പ്രാഥമിക നിഗമനം. ഇരുന്ന ശേഷം തോക്ക് തലയിലേക്ക് ചേർത്തുവച്ച് വെടിവെക്കുകയായിരുന്നുവെന്നാണ് പോലീസ് വ്യക്തമാക്കുന്നത്. ഇന്ന് രാത്രി 12 മണി മുതൽ 2 മണിവരെയാണ് തുഷാറിന് ഡ്യൂട്ടി ഉണ്ടായിരുന്നത്. ഇതിനിടെ ഓരോ മണിക്കൂർ ഇടവേളയിൽ സുരക്ഷാ പോസ്റ്റുകളിലെത്തി ബാറ്ററികൾ മാറ്റി നൽകുമായിരുന്നു. ഇത്തരത്തിൽ ബാറ്ററി മാറ്റി നൽകാൻ എത്തിയ മറ്റൊരു ഉദ്യോഗസ്ഥനാണ് തുഷാറിനെ മരിച്ച നിലയിൽ കണ്ടെത്തിയത്.

പ്രാഥമിക നിഗമനത്തിൽ ഇയാൾ സ്വയം വെടിവച്ച് മരിച്ചതാണെന്ന് മനസിലാക്കാൻ കഴിഞ്ഞതായും അന്വേഷണം തുടരുകയാണെന്നും ഹാർബർ പോലീസ് അറിയിച്ചു.

കാസര്‍കോട് 14കാരി പീഡനത്തിനിരയായി; പ്രദേശവാസികളായ 3 പേര്‍ അറസ്റ്റില്‍
അസ്വാഭാവിക മരണത്തിന് കേസെടുത്ത ഹാർബർ പോലീസ് അന്വേഷണം ആരംഭിച്ചു. നാവികസേനയും അന്വേഷണത്തിന് ഉത്തരവിട്ടു. തുഷാറിൻ്റെ മൃതദേഹം കൊച്ചി നാവികസേനാ ആസ്ഥാനത്തെ ഐഎന്‍എച്ച്എസ് സഞ്ജീവിനി ആശുപത്രിയിലേക്കു മാറ്റി.