ഖത്തറില്‍ തൊഴിലാളികള്‍ക്കുള്ള നിര്‍ബന്ധിത ഉച്ച വിശ്രമ സമയം നിലവില്‍ വന്നു

ദോഹ: ഖത്തറില്‍ ചൂട് കൂടിയ സാഹചര്യത്തില്‍ പുറം ജോലികളില്‍ ഏര്‍പ്പെടുന്ന തൊഴിലാളികള്‍ക്കുള്ള നിര്‍ബന്ധിത ഉച്ച വിശ്രമ സമയം ഇന്നലെ ജൂണ്‍ ഒന്നു മുതല്‍ നിലവില്‍ വന്നു. ഓഫീസുകള്‍ക്കു പുറത്ത് നിര്‍മാണ സൈറ്റുകളിലും മറ്റുമായി പുറം ജോലികളിലേര്‍പ്പെടുന്ന എല്ലാ തൊഴിലാളികള്‍ക്കും രാവിലെ 10 മണി മുതല്‍ വൈകിട്ട് 3.30 വരെ നിര്‍ബന്ധിത വിശ്രമം അനുവദിക്കണമെന്നാണ് തൊഴില്‍ മന്ത്രാലയത്തിന്റെ ഉത്തരവ്. തൊഴിലാളികളെ സൂര്യാഘാതം ഉള്‍പ്പെടെയുള്ള പ്രശ്‌നങ്ങളില്‍ നിന്ന് സംരക്ഷിക്കുന്നതിന്റെ ഭാഗമായാണ് നടപടി. സെപ്തംബര്‍ 15 വരെ തൊഴില്‍ സമയത്തിലുള്ള ഈ നിയന്ത്രണം തുടരും.

Also Read: വാക്‌സിന്‍ എടുത്തവര്‍ക്ക് ക്വാറന്റൈന്‍ വേണ്ടെന്ന് സൗദി; അല്ലാത്തവര്‍ക്ക് ഏഴു ദിവസം
താരതമ്യേന ചൂട് കൂടുതലായതിനാല്‍ ഈ വര്‍ഷം രണ്ട് മണിക്കൂര്‍ അധിക വിശ്രമമാണ് ഖത്തര്‍ തൊഴില്‍ മന്ത്രാലയം വിശ്രമം അനുവദിച്ചിരിക്കുന്നത്. സപ്തംബര്‍ 15 വരെ നിര്‍ബന്ധിത വിശ്രമ സമയം ഒഴിവാക്കി തൊഴിലാളികളുടെ സമയക്രമം ക്രമീകരിക്കണമെന്ന് തൊഴിലുടമകള്‍ക്കും കമ്പനികള്‍ക്കും മന്ത്രാലയം നിര്‍ദ്ദേശം നല്‍കി. പുതുക്കിയ സമയക്രമം തൊഴിലിടങ്ങളില്‍ എല്ലാവര്‍ക്കും കാണാവുന്ന രീതിയില്‍ പതിപ്പിക്കണം. കൂടാതെ തൊഴിലിടങ്ങളില്‍ തണുത്ത കുടിവെള്ളം ലഭ്യമാക്കണമെന്നും ക്ഷീണം അനുഭവപ്പെടുന്ന തൊഴിലാളികള്‍ക്ക് വിശ്രമിക്കാനും പ്രഥമശുശ്രൂഷ നല്‍കാനുമുള്ള സൗകര്യപ്രദമായ സംവിധാനമൊരുക്കണമെന്നും നിര്‍ദ്ദേശമുണ്ട്. ചൂട് കാലത്തിന് അനുയോജ്യമായ അയഞ്ഞതും കനം കുറഞ്ഞതും ഇളം നിറത്തിലുള്ളതുമായ വസ്ത്രങ്ങള്‍ തൊഴിലാളികള്‍ക്ക് നല്‍കണം. തൊഴിലിടങ്ങളിലെ താപനില കൃത്യമായി അളക്കാനുള്ള സംവിധാനം സജ്ജീകരിക്കണം. വെറ്റ്ബള്‍ബ് ഗ്ലോബ് ടെമ്പറേച്ചല്‍ സൂചിക അനുസരിച്ച് 32.1 ഡിഗ്രി കടന്നാല്‍ ജോലി നിര്‍ത്തിവെക്കണം.

നിരോധിത സമയത്ത് തൊഴിലാളികളെ കൊണ്ട് പുറം ജോലി ചെയ്യിക്കുന്നില്ലെന്ന് ഉറപ്പുവരുത്തുന്നതിന് മന്ത്രാലയം ഉദ്യോഗസ്ഥര്‍ തൊഴിലിടങ്ങളില്‍ വ്യാപകമായ പരിശോധനകള്‍ നടത്തും. നിയമം ലംഘിക്കുന്ന സ്ഥാപനങ്ങള്‍ക്കും കമ്പനികള്‍ക്കും പിഴ, പ്രവൃത്തി നിര്‍ത്തിവെക്കല്‍, ലൈസന്‍സ് റദ്ദാക്കല്‍ ഉള്‍പ്പെടെയുള്ള ശിക്ഷകള്‍ ലഭിക്കുമെന്നും മന്ത്രാലയം മുന്നറിയിപ്പ് നല്‍കി.