ഓണത്തിന് നല്ല നിറവും രുചിയുമുള്ള ക്യാരമൽ പാൽ പായസം തയാറാക്കാം

മുതിർന്നവർ മുതൽ കുട്ടികൾ വരെ പായസ കൊതിയുള്ളവരായിരിക്കും. പായസം കഴിഞ്ഞാൽ അൽപ്പം പുളിശേരി കുടിച്ച് വേണം ദഹനം ശരിയാക്കാൻ. പുളിശേരി മാത്രമല്ല, രസം, ഇഞ്ചിക്കറി എന്നിങ്ങനെ സദ്യയിൽ അവസാനം വിളമ്പുന്ന പലതും ദഹനത്തിന് ഏറെ നല്ലതാണ്. സദ്യ പൂർണമാകണമെങ്കിൽ ഇങ്ങനെ വേണം കഴിക്കാൻ. സദ്യയ്ക്ക് വിളമ്പാൻ സാധാരണയിൽ നിന്ന് വ്യത്യസ്തമായി ഒരു ക്യാരമൽ പാൽ പായസം തയാറാക്കാം. കേക്കിലും മറ്റും ക്യാരമൽ ഒഴിക്കുന്നത് പലർക്കും അറിയാവുന്ന കാര്യമാണ്. എന്നാൽ ക്യാരമൽ പാൽ പായസത്തെക്കുറിച്ച് പലരും കേട്ടിട്ടുണ്ടാകില്ല. നല്ല രുചിയും നിറവുമൊക്കെയുള്ള പായസമാണിത്.

ഇതിന് ആവശ്യമായ ചേരുവകൾ

പാൽ – 2 ലിറ്റർ, പഞ്ചസാര – 1 കപ്പ്, ഉണക്കലരി – 3/4 കപ്പ് പകുതി വേവിച്ചത്, നെയ്യ് – 1 ടീ സ്പൂൺ, ഏലയ്ക്ക പൊടി – 1/2 ടീ സ്പൂൺ ഇത്രയും ചേരുവകളാണ് ഈ പായസം തയാറാക്കാൻ ആവശ്യമായിട്ടുള്ളത്. പാലട പാൽ പായസം ഉണ്ടാക്കാൻ അട വേവിച്ചും ഉപയോഗിക്കാവുന്നതാണ്.

പായസം തയാറാക്കുന്ന വിധം

ചുവട് കട്ടിയുള്ള ഒരു പാത്രത്തിൽ നന്നായി ഉണക്കലരി കഴുകി വ്യത്തിയാക്കി പകുതി വേവുന്നത് വരെ വയ്ക്കുക. ഇനി മറ്റൊരു ചുവട് കട്ടിയുള്ള പാത്രത്തിലേക്ക് പഞ്ചസാരയിട്ട് ക്യാരമൽ ചെയ്ത് എടുക്കുക. കരിഞ്ഞ് പോകാതെ സൂക്ഷിക്കാൻ പ്രത്യേകം ശ്രദ്ധിക്കണം. ആദ്യം പഞ്ചസാര പാത്രത്തിൻ്റെ നടുവിലായിട്ട് ഇട്ട ശേഷം ഉരുകുന്നത് വരെ കാത്തിരിക്കുക. അതിന് ശേഷം മാത്രം ഇളക്കുക. പഞ്ചസാര ഉരുകി ഗോൾഡൻ ബ്രൌൺ നിറമായ ശേഷം ഇതിലേക്ക് എടുത്ത് വച്ചിരിക്കുന്ന പാൽ ഒഴിക്കാം. പാൽ ഒഴിക്കുമ്പോൾ ക്യാരമൽ കട്ടിയായി പോകുമെങ്കിലും നന്നായി ഇളക്കി കൊടുക്കാൻ മറക്കരുത്. ഇളക്കുന്നത് അനുസരിച്ച് പഞ്ചസാര വീണ്ടും ഉരുകി വന്നോളം. പാൽ തിളക്കുമ്പോൾ പകുതി വേവിച്ച് വച്ച ഉണക്കലരി ഇതിലേക്ക് ചേർക്കാം. നന്നായി തിളച്ച് കുറുകി വന്ന ശേഷം ഇതിലേക്ക് ഏലയ്ക്ക് പൊടിയും നെയ്യും ചേർത്ത് വിളമ്പാം.