ബിജെപിയുടെ വോട്ട് കുറഞ്ഞാല്‍ അത് യുഡിഎഫിന് ചെയ്തതാണെന്ന് ഗോവിന്ദന്‍ പറയുന്നു; സിപിഎമ്മിന്റെ വോട്ട് കുറഞ്ഞാല്‍ എന്ത് പറയും? വിഡി സതീശൻ

തെരഞ്ഞെടുപ്പില്‍ എന്താണ് സംഭവിക്കാന്‍ പോകുന്നതെന്ന് എം വി ഗോവിന്ദന് മനസിലായി. ബിജെപിയുടെയാണോ സിപിഎമ്മിന്റെയാണോ വോട്ടുകള്‍ കുറയുന്നതെന്ന് കണക്ക് വരുമ്പോള്‍ നോക്കാമെന്നും ബിജെപിയുടെ വോട്ട് കുറഞ്ഞാല്‍ അത് യുഡിഎഫിന് ചെയ്തതാണെന്ന് ഗോവിന്ദന്‍ പറയും. സിപിഎമ്മിന്റെ വോട്ട് കുറഞ്ഞാല്‍ എന്ത് പറയുമെന്നും അദ്ദേഹം ചോദിച്ചു.

പിണറായി വിജയന്റെ ധാര്‍ഷ്ട്യം നിറഞ്ഞ ഭരണത്തിന് താക്കീത് നല്‍കണമെന്നും കേരളത്തിലെ കമ്മ്യൂണിസ്റ്റ് പാര്‍ട്ടിയെ പിണറായി ബംഗാളിലേതു പോലെ കുഴിച്ച് മൂടുമെന്നും ചൂണ്ടിക്കാട്ടി ഉത്തമരായ കമ്മ്യൂണിസ്റ്റുകള്‍ ചാണ്ടി ഉമ്മന് വോട്ട് ചെയ്യണമെന്ന് അഭ്യര്‍ത്ഥിച്ചിരുന്നു. ജെയ്ക്കിന്റെ വോട്ട് കുറഞ്ഞാല്‍ ഉത്തമരായ കമ്മ്യൂണിസ്റ്റുകള്‍ ചാണ്ടി ഉമ്മന് വോട്ട് ചെയ്‌തെന്ന് സമ്മതിക്കാന്‍ ഗോവിന്ദന്‍ തയാറാകുമോ? അത് കഴിഞ്ഞ് ബിജെപിയുടെ കാര്യം നോക്കാമെന്നും അദ്ദേഹം പറഞ്ഞു.

‘ബിജെപി വോട്ട് വാങ്ങാതെ ചാണ്ടി ഉമ്മൻ ജയിക്കില്ല. ബിജെപി വോട്ട് യുഡിഎഫ് വാങ്ങിയില്ലെങ്കിൽ ഞങ്ങൾ ജയിക്കും. ആര് ജയിച്ചാലും വലിയ ഭൂരിപക്ഷമുണ്ടാവില്ലെന്നും സിപിഎം സംസ്ഥാന സെക്രട്ടറി എം വി ഗോവിന്ദൻ പറഞ്ഞിരുന്നു. ഇതിൽ പ്രതികരിക്കുകയായിരുന്നു പ്രതിപക്ഷ നേതാവ്.

ചൊവ്വാഴ്ച നടന്ന ഉപതെരഞ്ഞെടുപ്പിൽ 72.86 ശതമാനം പേരാണ് വോട്ട് ചെയ്തത്. 1,28,535 പേരാണ് വോട്ട് ചെയ്തത്. 64,078 പുരുഷൻമാരും 64,455 സ്ത്രീകളും രണ്ട് ട്രാൻസ്ജൻഡേഴ്സും വോട്ട് രേഖപ്പെടുത്തിയിട്ടുണ്ട്.

പോസ്റ്റൽ ബാലറ്റ് മുഖേന 2,491 അസന്നിഹിത വോട്ടർമാർ നേരത്തേ വോട്ടു ചെയ്തു. 2021ൽ 74.84% ആയിരുന്നു പോളിങ്.

Also Read : 160 കിലോ ഭാരമുള്ള സ്ത്രീ കട്ടിലിൽ നിന്നും വീണു; തിരികെ കയറ്റാൻ ദുരന്തനിവാരണ സേന

പുതുപ്പള്ളിയില്‍ യുഡിഎഫ് സ്ഥാനാര്‍ത്ഥിയായ ചാണ്ടി ഉമ്മന്‍ വന്‍ ഭൂരിപക്ഷത്തില്‍ വിജയിക്കുമെന്ന് എക്‌സിറ്റ് പോള്‍ ഫലങ്ങള്‍ ഇന്നലെ പുറത്തുവന്നിരുന്നു. പോള്‍ ചെയ്തതിന്റെ 53 ശതമാനം വോട്ട് നേടി ചാണ്ടി ഉമ്മന്‍ ജയിക്കുമന്നാണ് ആക്‌സിസ് മൈ ഇന്ത്യ എക്‌സിറ്റ് പോള്‍ പറയുന്നത്. വിവിധ ബൂത്തുകളില്‍ വോട്ട് ചെയ്തിറങ്ങിയ 509 വോട്ടര്‍മാരെ നേരിട്ട് കണ്ടാണ് ആക്‌സിസ് മൈ ഇന്ത്യ എക്‌സിറ്റ് പോള്‍ തയ്യാറാക്കിയത്.

Read Latest Kerala News and Malayalam News