പണം കൊടുത്തു വാക്സിൻ വാങ്ങാനാളില്ല; ഇന്ത്യയിൽ സ്വകാര്യ മേഖല വഴി കൊടുത്തത് 7.5% ഡോസുകൾ മാത്രം

ന്യൂഡൽഹി: കേന്ദ്രസര്‍ക്കാരിൻ്റെ വാക്സിനേഷൻ നയം അനുസരിച്ച് 25 ശതമാനം വാക്സിൻ ഡോസുകള്‍ സ്വകാര്യമേഖല വഴിയാണ് വിതരണം ചെയ്യേണ്ടത്. എന്നാൽ സ്വകാര്യ വാക്സിനേഷൻ കേന്ദ്രങ്ങള്‍ വഴി ഇതുവരെ വിതരണം ചെയ്തത് മൊത്തം വാക്സിൻ്റെ 7.5 ശതമാനം മാത്രമാണെന്ന് റിപ്പോര്‍ട്ട്. ഏഴു സംസ്ഥാനങ്ങളിലോ കേന്ദ്രഭരണപ്രദേശങ്ങളിലോ മാത്രമാണ് 10 ശതമാനത്തിലധികം ഡോസ് വാക്സിൻ വിതരണം ചെയ്യപ്പെട്ടിട്ടുള്ളതെന്നും ടൈംസ് ഓഫ് ഇന്ത്യ റിപ്പോര്‍ട്ടിൽ പറയുന്നു.

സ്വകാര്യ ആശുപത്രികളിൽ 600 രൂപയിലധികം നല്‍കിയാണ് ആളുകള്‍ ഒരു ഡോസ് കൊവിഡ് വാക്സിൻ സ്വീകരിക്കുന്നത്. കൊവിൻ ആപ്പിൽ പട്ടികപ്പെടുത്തിയിട്ടുള്ള 750 ജില്ലകളിൽ 80 ജില്ലകളിൽ മാത്രമാണ് സ്വകാര്യ വാക്സിനേഷൻ കേന്ദ്രങ്ങള്‍ വഴിയുള്ള വാക്സിനേഷൻ 10 ശതമാനം കടന്നത്. ഇതിൽ തന്നെ ചുരുക്കം ചില നഗരമേഖലകളിലാണ് സ്വകാര്യ മേഖല വഴിയുള്ള വാക്സിനേഷൻ നടന്നിരിക്കുന്നതെന്നും റിപ്പോര്‍ട്ടിൽ പറയുന്നു. നഗരമേഖലകളിലെ 25 ജില്ലകളിലാണ് സ്വകാര്യ ആശുപത്രികള്‍ 54 ശതമാനം വാക്സിനും വിതരണം ചെയ്തത്.

Also Read: എപി അബ്ദുള്ളക്കുട്ടിയുടെ വീട്ടിൽ വിജിലൻസ്; അഴിമതി കേസിൽ അന്വേഷണം

കേരളം ഉള്‍പ്പെടെ ഏഴിടത്താണ് സ്വകാര്യ ആശുപത്രികള്‍ പത്ത് ശതമാനത്തിലധികം ഡോസ് വാക്സിൻ വിതരണം ചെയ്തത്. 21.1 ശതമാനം ഡോസ് വാക്സിൻ സ്വകാര്യ ആശുപത്രികള്‍ വഴി നല്‍കിയ ഡൽഹിയാണ് ഏറ്റവും മുന്നിൽ. ചണ്ഡ‍ിഗഡിൽ 14.6 ശതമാനവും തെലങ്കാനയിൽ 14 ശതമാനവും ഡോസുകള്‍ സ്വകാര്യ മേഖല വഴി വിതരണം ചെയ്തു. മഹാരാഷ്ട്ര (13.3%), തമിഴ്നാട് (12.4%), കര്‍ണാടക (12%) എന്നീ സംസ്ഥാനങ്ങളാണ് തൊട്ടുപിന്നിൽ. കേരളത്തിൽ വിതരണം ചെയ്തതിൽ 11.9 ശതമാനം ഡോസുകളാണ് ആളുകൾ പണം കൊടുത്തു വാങ്ങിയത്.

Also Read: കൊടകര കേസിൽ പത്ത് ദിവസത്തിനുള്ളിൽ മറുപടി നൽകണം; ഇഡിയോട് ഹൈക്കോടതി

രാജ്യത്തെ 80 ശതമാനത്തോളം ജില്ലകളിലും പൊതുമേഖലയിലൂടെയാണ് 95 ശതമാനം വാക്സിനും വിതരണം ചെയ്യപ്പെട്ടതെന്ന് കണക്േകുകള്ർ സൂചിപ്പിക്കുന്നു. രാജ്യത്തെ പകുതിയോളം ജില്ലകളിലും ഒരു ശതമാനത്തിലും താഴെയാണ് സ്വകാര്യ മേഖലയുടെ പങ്ക്. വടക്കുകിഴക്കൻ സംസ്ഥാനങ്ങളിലും ഗ്രാമീണ മേഖലകളിലുമാണ് സ്വകാര്യമേഖല വഴിയുള്ള വാക്സിൻ വിതരണം ഏറ്റവും പിന്നിൽ.

ബെംഗളൂരു, ഡൽഹി, ഹൈദരാബാദ്, മുംബൈ, കൊൽക്കത്ത, ചെന്നൈ തുടങ്ങിയ നഗരങ്ങളാണ് പണം വാങ്ങിയുള്ള വാക്സിനേഷനിൽ ഏറ്റവും മുന്നിൽ. 44 ശതമാനം പേരാണ് ബെംഗളൂരുവിൽ മാത്രം ഇതുവരെ പണം കൊടുത്ത് വാക്സിൻ വാങ്ങിയത്.

ഞായറാഴ്ച രാവിലെ ഏഴു മണി വരെ കൊവിൻ ആപ്പിൽ ലഭ്യമായ വിവരങ്ങള്ർ പ്രകാരമാണ് ടൈംസ് ഓഫ് ഇന്ത്യ ഈ റിപ്പോർട്ട് തയ്യാറാക്കിയിട്ടുള്ളത്. ജനുവരി 16നു തുടങ്ങിയ വാക്സിനേഷൻ യജ്ഞത്തിൻ്റെ ഭാഗമായി ഇതുവരെ മൊത്തം 20.8 കോടി ഡോസ് വാക്സിൻ വിതരണം ചെയ്തതായും ഇതിൽ 1.6 കോടി ഡോസ് മാത്രമാണ് സ്വകാര്യ മേഖല വഴി വിതരണം ചെയ്തതെന്നും കണക്കുകള്ർ സൂചിപ്പിക്കുന്നു.