![ശിവസേന [ഷിൻഡെ വിഭാഗം]](https://www.udayakeralam.com/wp-content/uploads/2025/02/ss-360x180.jpg)
രണ്ട് തവണ ഫിലിം ഫെയര്‍ പുരസ്‍കാരം നേടിയ ജൂഹി, ബോളിവുഡിന് പുറത്ത് സംരഭകയാണ്. ഭര്‍ത്താവും വ്യവസായിയുമായ ജെയ്‍ മെഹ്‍തയ്‍ക്കും ബോളിവുഡ് നടന്‍ ഷാരൂഖ് ഖാനുമൊപ്പം ഐ.പി.എല്‍ ക്രിക്കറ്റ് ടീം കൊല്‍ക്കത്ത നൈറ്റ റൈഡേഴ്‍സ്‍ ഉടമസ്ഥതയും ജൂഹിക്കുണ്ട്.
52 ലക്ഷംപേര്‍ ട്വിറ്ററില്‍ പിന്തുടരുന്ന ജൂഹി ചൗള, താന്‍ ഒരു അവകാശപ്രവര്‍ത്തകയും ജൈവകൃഷി പ്രോത്സാഹിപ്പിക്കുന്ന വ്യക്തിയും പരിസ്ഥിതി പ്രവര്‍ത്തകയും ആണെന്ന് അവകാശപ്പെടുന്നു. അതിന്‍റെ വിചിത്രമായ ഒരു ഉദാഹരണം ജൂൺ നാലിന് ഇന്ത്യ കണ്ടു.
5ജി സാങ്കേതികവിദ്യ ഇന്ത്യയില്‍ നടപ്പാക്കുന്നതിന് എതിരെ ജൂഹി നല്‍കിയ ഒരു പരാതി ഡല്‍ഹി ഹൈക്കോടതി തള്ളി. പ്രശസ്‍തിക്ക് വേണ്ടിയാണ് ഹര്‍ജി സമര്‍പ്പിച്ചതെന്ന് നിരീക്ഷിച്ച കോടതി, 20 ലക്ഷംരൂപ പിഴയും അടയ്ക്കാന് നിര്‍ദേശിച്ചു.
5000 പേജ് ആണ് ജൂഹി സമര്‍പ്പിച്ച പരാതി. ഇതില്‍ ഏതാനും വാചകങ്ങള്‍ മാത്രമേ തങ്ങളുടെ നേരിട്ടുള്ള അറിവില്‍ നിന്ന് ആണെന്ന് പരാതിക്കാരി സമ്മതിച്ചത്. മാധ്യമലേഖനങ്ങളും ചില പഠനങ്ങളും ആയിരുന്നു പരാതിയുടെ ആധാരം. ഇതിലധികവും വിവാദപരമായ ഉള്ളടക്കങ്ങളുമായിരുന്നു – കോടതി വിധി നിരീക്ഷിക്കുന്നു.
പരാതിയുടെ ശവപ്പെട്ടിയില്‍ അവസാനത്തെ ആണിയടിച്ച് ഹൈക്കോടതി നിരീക്ഷിക്കുന്നു;
എങ്ങനെ ഒരുപരാതി തയാറാക്കരുത് എന്നതിന് എല്ലാംതികഞ്ഞ ഒരു ഉദാഹരണമാണിത്. ലോ കോളേജുകളിലും പുതിയ അഭിഭാഷകര്‍ക്കും ഇത് പഠിക്കാന്‍ നല്‍കണം. സ്വന്തം കക്ഷിക്ക് അപകടം വരുത്തുന്ന രീതിയില്‍ പരാതികള്‍ തയാറാക്കുന്നത് ഒഴിവാക്കാന്‍ ഇത് സഹായിക്കും.
5ജി വിരുദ്ധത
5ജി സാങ്കേതികവിദ്യയ്‍ക്ക് എതിരെ ജൂഹി ചൗള കോടതിയെ സമീപിച്ചത് ”ഗുരുതരമായ” ഒരു വിഷയവുമായാണ്. 5ജി റേഡിയേഷൻ ആയിരുന്നു പരാതിയുടെ കാതല്‍. ഇന്ത്യയില്‍ 5ജി നടപ്പാക്കുന്നത് പഠനങ്ങള്‍ക്ക് ശേഷം മാത്രം മതി. മനുഷ്യര്‍ക്കും ജീവികള്‍ക്കും സസ്യജാലങ്ങള്‍ക്കും അപകടകരമായ വികിരണമാണ് 5ജി സൃഷ്‍ടിക്കുന്നത് എന്നതായിരുന്നു അവകാശവാദം.
യൂറോപ്പിലെ വിവിധ രാജ്യങ്ങളില്‍ സമാനമായ പ്രശനങ്ങള്‍ ഉണ്ടെന്നും സര്‍ക്കാരുകള്‍ പദ്ധതികള്‍ പുനപരിശോധിക്കുകയാണെന്നുമാണ് ജൂഹിയുടെ പരാതി. ജൂഹി ചൗളയ്‍ക്ക് ഒപ്പം നിരവധി പേര്‍ പരാതിക്കാരായി ഉണ്ടായിരുന്നു. 33 പേരെയാണ് ജൂഹി കക്ഷി ചേര്‍ത്തിരുന്നത്. ഇതില്‍ സയൻസ് ആൻഡ് എൻജിനീയറിങ് റിസര്‍ച്ച് ബോര്‍ഡ് മുതല്‍ ലോകാരോഗ്യ സംഘടന വരെ ഉണ്ടായിരുന്നു – നിയമകാര്യ മാധ്യമ പോര്‍ട്ടല്‍ ലൈവ് ലോ 2021, മെയ് 31ന് പ്രസിദ്ധീകരിച്ച റിപ്പോര്‍ട്ടില്‍ പറയുന്നു.
എന്താണ് ജൂഹി ചൗള പ്രചരിപ്പിക്കുന്നത്?
ഇന്ത്യയില്‍ ജൂഹി ചൗള ഒറ്റയ്‍ക്കാണെന്നും അവരുടെ പരാതി വിഡ്ഢിത്തമാണെന്നും നിങ്ങള്‍ക്ക് തോന്നിയേക്കാം. പക്ഷേ, 5ജി ഒരു വിപത്താണെന്നും അന്താരാഷ്ട്ര ഗൂഢാലോചനയാണെന്നും കൊറോണ വൈറസ് വ്യാപനത്തിന് കാരണമാണെന്നും കരുതുന്ന ലക്ഷക്കണക്കിന് ആളുകളുണ്ട്. മറ്റു കാര്യങ്ങളില്‍ ജൂഹി വിശ്വസിക്കുന്നുണ്ടോ എന്ന് ഉറപ്പില്ലെങ്കിലും റേഡിയേഷന് വിരുദ്ധയാണ് അവരെന്നതില്‍ തര്‍ക്കങ്ങളില്ല.
2021, ജൂൺ മൂന്നിന് ട്വിറ്റര്‍ ഹാൻഡിലില്‍ ജൂഹി ചൗള ഒരു വീഡിയോ ഷെയര്‍ ചെയ്‍തിരുന്നു. മൊബൈല്‍ഫോണുകളില്‍ നിന്നുള്ള അപകടകരമായ റേഡിയേഷന് തടയുന്നതിനുള്ള ഉല്‍പ്പന്നങ്ങള്‍ വില്‍ക്കുന്നു എന്ന് അവകാശപ്പെടുന്ന എൻവിറോണിക്സ് എന്ന സംഘടനയുടെ വീഡിയോ ആണ് ജൂഹി ഷെയര്‍ ചെയ്‍തത്.
ഈ സംഘടന വില്‍ക്കുന്ന പ്രധാനപ്പെട്ട ഉല്‍പ്പന്നങ്ങളിലൊന്നായ എൻവിറോ ചിപ് മൊബൈല്‍ റേഡിയഷന്‍ ശുദ്ധീകരിക്കും എന്നാണ് അവകാശപ്പെടുന്നത്. ഒപ്പം സമ്മര്‍ദ്ദം കുറയ്ക്കാനും രോഗപ്രതിരോധശേഷി വര്‍ധിപ്പിക്കാനും ഉപകരിക്കുമെന്നാണ് പരസ്യത്തിലെ വാദം.
2021 ഫെബ്രുവരി 24ന് ജൂഹി ചൗള മറ്റൊരു ട്വീറ്റില്‍ റേഡിയേഷനെക്കുറിച്ച് ഒരു അബദ്ധം പ്രചരിപ്പിക്കുന്നുണ്ട്. ഫോൺ ചാര്‍ജ് ചെയ്‍തുകൊണ്ട് സംസാരിക്കുന്നത് റേഡിയേഷന് കാരണമാകുമെന്നും ഇതിന്‍റെ ദൂഷ്യവശം അറിയാന്‍ പോകുന്നതെയുള്ളൂ എന്നുമാണ് ജൂഹി വാദിക്കുന്നത്.
ജൂഹി ഷെയര്‍ ചെയ്‍ത വീഡിയോ പക്ഷേ, ഫ്രഞ്ച് – അന്താരാഷ്ട്ര വാര്‍ത്താ ഏജൻസി എ.എഫ്‍.പി നേരത്തെ തന്നെ വ്യാജമാണെന്ന് കണ്ടെത്തിയതാണ്.
2020 നവംബര്‍ 11ന് ജൂഹിയുടെ ഒരു ട്വീറ്റ്, മാസ്‍ക് ധരിക്കുമ്പോള്‍ ഉണ്ടാകുമെന്ന് പ്രചരിച്ച കാര്‍ബൺ ഡയോക്സൈഡ് മലിനീകരണവും അതേ മാസം മൂന്നാം തീയതിയിലെ ഒരു ട്വീറ്റ് മാസ്‍ക് വിരുദ്ധരെ പിന്തുണച്ചും കൊവിഡ് ഒരു ഗൂഢാലോചനയാണെന്നുമായിരുന്നു.
മരത്തൈകള്‍ നടുന്നതിലാണ് ജൂഹി ശ്രദ്ധിക്കുന്നത്. കാവേരി തടത്തില്‍ 242 കോടി മരങ്ങള്‍ നടുക എന്ന ലക്ഷ്യത്തില്‍ പ്രവര്‍ത്തിക്കുന്ന ഈഷ ഫൗണ്ടേഷന് ഒപ്പമാണ് ജൂഹി സഹകരിക്കുന്നത് എന്ന് അവരുടെ സോഷ്യല്‍ മീഡിയ പോസ്റ്റുകള്‍ പറയുന്നു. ഹിന്ദു സന്യാസിയും പ്രഭാഷകനുമായ സദ്‍ഗുരു ജഗ്ഗി വാസുദേവ് നയിക്കുന്ന കാവേരി കോളിങ് എന്ന പദ്ധതി കര്‍ണാടക സര്‍ക്കാരുമായി ചില നിയമ പ്രശനങ്ങളില്‍ കലാശിച്ചിരുന്നു.
എന്തുകൊണ്ട് 5ജി വിരുദ്ധത?
5ജി സാങ്കേതികവിദ്യ ലോകവ്യാപകമായി ആള്‍ക്കൂട്ടങ്ങളുടെ ആരോപണങ്ങള്‍ക്ക് വിധേയമായിട്ടുണ്ട്. ഇന്ത്യയില്‍ ഇനിയും 5ജി അടിസ്ഥാന സൗകര്യങ്ങള്‍ ആരംഭിച്ചിട്ടില്ല. പഠനം നടത്താതെ പദ്ധതിയുമായി മുന്നോട്ടുപോകരുതെന്നാണ് ജൂഹി ഉള്‍പ്പെടെയുള്ളവരുടെ ആവശ്യം.
യൂറോപ്പിലും അമേരിക്കയിലും ഏതാനും വര്‍ഷങ്ങളായി 5ജി വിരുദ്ധര്‍ പ്രതിഷേധിക്കുന്നുണ്ട്. ചില സന്ദര്‍ഭങ്ങളില്‍ കൂട്ടറാലികളും അതിക്രമങ്ങളും നടക്കുന്നു. നിരവധി സന്ദര്‍ഭങ്ങളില്‍ 5ജി മൊബൈല്‍ ടവറുകള്‍ക്ക് ആളുകള്‍ തീയിടുന്നു. — യുഎസ് മാധ്യമം പൊളിറ്റിക്കോ 2020, ഒക്ടോബറില്‍ റിപ്പോര്‍ട്ട് ചെയ്യുന്നു.
യൂറോപ്യന്‍ യൂണിയനിലെ 15 രാജ്യങ്ങളാണ് 2020ല്‍ യൂറോപ്യന്‍ യൂണിയന്‍ കമ്മീഷന് ഇത് കാണിച്ച് കത്തെഴുതിയത്. 2020ല്‍ മാത്രം 18 രാജ്യങ്ങളില്‍ 210 ആക്രമണങ്ങളാണ് 5ജി ടവറുകള്‍ക്ക് നേരെയുണ്ടായത് – ടെലികോം കമ്പനികളുടെ കൂട്ടായ്‍മ ജി.എസ്.എം.എ റിപ്പോര്‍ട്ട് പറയുന്നു.
5ജി സാങ്കേതികവിദ്യ ഉപയോഗിക്കുന്നത് റേഡിയേഷന് കൂടുല്‍ പതിക്കാന്‍ കാരണമാകുന്നു, കാന്‍സര്‍ പോലെയുള്ള രോഗങ്ങളുണ്ടാകുന്നു, പൊതു ആരോഗ്യത്തെ ബാധിക്കുന്നു തുടങ്ങിയവയാണ് പ്രതിഷേധങ്ങള്‍ക്ക് പിന്നില്‍. കൊവിഡ് വ്യാപനത്തിന് 5ജി ടവറുകളാണ് കാരണമെന്ന വ്യാജപ്രചാരണം സോഷ്യല്‍ മീഡിയയില്‍ വര്‍ധിച്ചതും അക്രമങ്ങള്‍ക്ക് കാരണമായി.
നിലവില്‍ ഉപയോഗിക്കുന്ന 4ജി സാങ്കേതികവിദ്യയുടെ അടുത്ത തലമാണ് 5ജി. ഉയര്‍ന്ന അളവില്‍ ഡേറ്റ കൈകാര്യം ചെയ്യാന്‍ കഴിയുന്ന ഈ തരംഗങ്ങള്‍ക്ക് അധികം ദൂരം സഞ്ചരിക്കാന്‍ കഴിയില്ല. 4ജിയില്‍ നിന്ന് വിഭിന്നമായി കുറച്ചുകൂടെ ശക്തിയേറിയ മില്ലിമീറ്റര്‍ തംരംഗങ്ങളാണ് 5ജിയില്‍ ഉപയോഗിക്കുന്നത്. — അന്താരാഷ്ട്ര ടെലികോം കമ്പനി ഓറഞ്ച് അവരുടെ വെബ്‍സൈറ്റില്‍ വിശദീകരിക്കുന്നു.
വയര്ലെസ് കമ്മ്യൂണിക്കേഷന് ഉപയോഗിക്കുന്ന തംരഗങ്ങള്‍ നോൺ അയണൈസിങ് സ്വഭാവത്തില്‍പ്പെട്ടവയാണ്. മനുഷ്യന്‍റെ ശരീരത്തില്‍ പ്രവേശിക്കാനോ ആറ്റം ഘടനയില്‍ മാറ്റങ്ങള്‍ വരുത്താനോ ഇവയ്ക്ക് കഴിയില്ല. 5ജിയും ഇതേ ഗണത്തില്‍പ്പെടുന്നതാണ് — സാങ്കേതികവിദ്യ ലോകത്തെ ഏറ്റവും വലിയ സംഘടനകളിലൊന്നായ ഇൻസ്റ്റിറ്റ്യൂട്ട് ഓഫ് ഇലക്ട്രിക്കല്‍ ആൻഡ് ഇലക്ട്രോണിക്സ് എൻജീനീയേഴ്‍സ് വിശദീകരിക്കുന്നു.
വയര്ലെസ് തരംഗങ്ങള്‍ അപകടകരമല്ലെന്ന് ലോകാരോഗ്യ സംഘടനയും നിഗമനത്തില്‍ എത്തിയിട്ടുണ്ട്.
ജൂഹി ചൗള കേസിന് ശേഷം എന്ത് സംഭവിക്കും?
5ജി സാങ്കേതിവിദ്യയുടെ പേരിലുള്ള ആരോപണങ്ങള്‍ ഇന്ത്യയിലെ ടെലികോം ഓപ്പറേറ്റര്‍മാര്‍ പൂര്‍ണമായും തള്ളിക്കളയുകയാണ്. റിലയന്‍സ് ജിയോ, എയര്‍ടെല്‍, വോഡഫോൺ ഐഡിയ കമ്പനികളുടെ കൂട്ടായ്‍മ സി.ഒ.എ.ഐ വാദിക്കുന്നത്, ഇന്ത്യയില്‍ നിലവിലുള്ള ഇലക്ട്രോ മാഗ്നറ്റിക് റേഡിയഷൻ പരിധി ലോക രാജ്യങ്ങളെക്കാള്‍ കര്‍ശനമാണെന്നാണ്.
ലോകത്ത് നിലവിലുള്ള പരിധിയെക്കാള്‍ പത്തിലൊന്ന് മാത്രമാണ് ഇന്ത്യയില്‍ അനുവദിക്കുന്നത്. പുതിയ സാങ്കേതികവിദ്യകള്‍ വരുമ്പോള്‍ സ്വാഭാവികമായുണ്ടാകുന്ന ഭയം മാത്രമാണ് ഇപ്പോഴത്തെത് എന്നാണ് സി.ഒ.എ.ഐ ഡയറക്റ്റര്‍ ജനറല്‍ എസ് പി കൊച്ചാര്‍ വാര്‍ത്താ ഏജൻസി പി.ടി.ഐയോട് പറയുന്നത്.
ജൂഹി ചൗളയോട് ഒരാഴ്ച്ചയ്ക്കുള്ളില്‍ പിഴ തുകയായ 20 ലക്ഷംരൂപ ഡല്‍ഹി സ്റ്റേറ്റ് ലീഗല്‍ സര്‍വീസ് അഥോറിറ്റിയില്‍ അടയ്ക്കാന് ആണ് കോടതി ഉത്തരവ്. ഇത് റോഡ് അപകടങ്ങളില്‍ മരണപ്പെട്ടവര്‍ക്കുള്ള സഹായധനമായി ഉപയോഗിക്കും – നിയമകാര്യ മാധ്യമം, ബാര്‍ ആൻഡ് ബെഞ്ച് റിപ്പോര്‍ട്ട് ചെയ്യുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : juhi chawla 5g case delhi high court radiation fears news
Malayalam News from malayalam.samayam.com, TIL Network
![ശിവസേന [ഷിൻഡെ വിഭാഗം]](https://www.udayakeralam.com/wp-content/uploads/2025/02/ss-120x86.jpg)
