അബുദാബി: അബൂദാബിയിലെ പിസിആര്‍ ടെസ്റ്റിംഗ് കേന്ദ്രങ്ങളില്‍ അടുത്ത ചൊവ്വാഴ്ച മുതല്‍ തിരക്കൊഴിഞ്ഞ നേരമുണ്ടാവില്ല. കാരണം ജൂണ്‍ 15 മുതല്‍ പൊതു ഇടങ്ങളില്‍ പ്രവേശനം ലഭിക്കണമെങ്കില്‍ അല്‍ ഹുസ്ന്‍ ആപ്പില്‍ ഗ്രീന്‍ പാസ് ഉണ്ടായിരിക്കണം. ഗ്രീന്‍ പാസ് ലഭിക്കണമെങ്കിലോ പിസിആര്‍ ടെസ്റ്റില്‍ കൊവിഡ് നെഗറ്റീവാവുകയും വേണം. അടുത്ത ചൊവ്വാഴ്ച മുതല്‍ റെസ്റ്റൊറന്റുകള്‍, കഫേകള്‍, ഷോപ്പിംഗ് മാളുകള്‍, വലിയ സൂപ്പര്‍ മാര്‍ക്കറ്റുകള്‍, ജിമ്മുകള്‍, ഹോട്ടലുകള്‍, പാര്‍ക്കുകള്‍, ബീച്ചുകള്‍, സ്വിമ്മിംഗ് പൂളുകള്‍, വിദോന കേന്ദ്രങ്ങള്‍, സിനിമാ തിയറ്ററുകള്‍, മ്യൂസിയങ്ങള്‍ തുടങ്ങിയ സ്ഥലങ്ങളില്‍ പ്രവേശിക്കുന്നതിനാണ് പിസിആര്‍ നെഗറ്റീവ് സര്‍ട്ടിഫിക്കറ്റ് നിര്‍ന്ധമാക്കിയിരിക്കുന്നത്.

​പരിശോധനാ കേന്ദ്രങ്ങളില്‍ തിരക്ക് കൂടും

ഇന്‍ഡോര്‍, ഔട്ട് ഡോര്‍ പരിപാടികള്‍ക്കും ഇത് ബാധകമാണ്. അതിനാല്‍ തന്നെ വരും ദിവസങ്ങളില്‍ പിസിആര്‍ പരിശോധന നടത്താനെത്തുന്നവരുടെ വലിയ തിരക്കാവും അബൂദാബിയില്‍ അനുഭവപ്പെടുക. വാക്‌സിന്‍ എടുത്തവര്‍ക്കും എടുക്കാത്തവര്‍ക്കും ഇക്കാര്യത്തില്‍ ഇളവില്ല. അതേസമയം, പിസിആര്‍ നെഗറ്റീവ് സര്‍ട്ടിഫിക്കറ്റിന്റെ കാലാവധിയില്‍ വ്യത്യാസമുണ്ട്. രണ്ട് ഡോസ് വാക്‌സിനെടുത്ത് 28 പിന്നിട്ടവരാണെങ്കില്‍ അവരുടെ പിസിആര്‍ നെഗറ്റീവ് സര്‍ട്ടിഫിക്കറ്റിന് 30 ദിവസമാണ് വാലിഡിറ്റി. അതായത് ടെസ്റ്റ് ചെയ്ത ശേഷമുള്ള 30 ദിവസം ഇവരുടെ അല്‍ ഹുസ്ന്‍ ആപ്പില്‍ ഗ്രീന്‍ പാസ് ലഭ്യമാവും. എന്നാല്‍ തീരെ വാക്‌സിന്‍ എടുക്കാത്തവരുടെ പിസിആര്‍ സര്‍ട്ടിഫിക്കറ്റിന് മൂന്നു ദിവസത്തെ കാലാവധി മാത്രമേ ഉള്ളൂ. അതായത് മൂന്നു ദിവസം കഴിഞ്ഞാല്‍ അത് ഉപയോഗിച്ച് പൊതുപരിപാടികളില്‍ പങ്കെടുക്കാനാവില്ല. അതിന് വീണ്ടും പിസിആര്‍ ടെസ്റ്റ് നടത്തേണ്ടതായി വരും.

​പിസിആര്‍ ടെസ്റ്റിന് ചെലവ് എത്ര?

കഴിഞ്ഞ മാര്‍ച്ചിലാണ് അബൂദാബി ആരോഗ്യ മന്ത്രാലയത്തിന് കീഴിലുള്ള സിഹ കേന്ദ്രങ്ങളിലെ പിസിആര്‍ ടെസ്റ്റ് നിരക്ക് 85 ദിര്‍ഹമില്‍ നിന്ന് 65 ദിര്‍ഹമായി കുറച്ചത്. മെഡിക്ലിനിക്ക്, ബയോജെനിക്‌സ് ഉള്‍പ്പെടെയുള്ള സ്വകാര്യ മെഡിക്കല്‍ ലാബുകളിലും ഏറെക്കുറെ ഇതു തന്നെയാണ് ഫീസായി ഈടാക്കുന്നത്. ചില ഇടങ്ങളില്‍ മാത്രമാണ് അല്‍പം കൂടുതലുള്ളത്. അതേസമയം, സിഹ കേന്ദ്രങ്ങളില്‍ സ്വദേശികള്‍, 50നു മുകളില്‍ പ്രായമായ പ്രവാസികള്‍, വിട്ടുമാറാത്ത രോഗങ്ങളുള്ളവര്‍, ഗര്‍ഭിണികള്‍, കൊവിഡ് ലക്ഷണങ്ങളുള്ളവര്‍, ഭിന്നശേഷിക്കാര്‍, യുഎഇ സ്വദേശികളുടെ വീട്ടുവേലക്കാര്‍ തുടങ്ങിയവര്‍ക്ക് പിസിആര്‍ ടെസ്റ്റ് സൗജന്യമാണ്. സാധാരണ നിലയില്‍ 24 മണിക്കൂറിനുള്ളില്‍ പരിശോധനാ ഫലം ലഭിക്കാറുണ്ടെങ്കിലും ചില ലാബുകള്‍ 48 മണിക്കൂര്‍ വരെ സമയം എടുക്കാറുണ്ട്. സിഹയുടെ മൊബൈല്‍ ആപ്പ് വഴി ടെസ്റ്റ് ബുക്ക് ചെയ്യാന്‍ സൗകര്യമുണ്ട്.

​എവിടെ നിന്നെല്ലാം ടെസ്റ്റ് ചെയ്യാം?

അബൂദാബിയുടെ ഏതാണ്ടെല്ലാ പ്രധാന കേന്ദ്രങ്ങളിലുമുള്ള സേഹ സെന്ററുകളില്‍ നിന്ന് പിസിആര്‍ ടെസ്റ്റ് നടത്താം. ഇവയ്ക്കു പുറമെ, അബൂദാബിയിലെ സായിദ് സ്‌പോര്‍ട്‌സ് സിറ്റി, കോര്‍ണിഷ്, അല്‍ ബഹിയ, അല്‍ ഷംഖ തുടങ്ങിയ സ്ഥലങ്ങളിലും അല്‍ ഐനിലെ അല്‍ ഹിലി, അല്‍ മസൂദി തുടങ്ങിയ സ്ഥലങ്ങളിലുമുള്ള ഡ്രൈവ് ത്രൂ സെന്ററുകളിലും ടെസ്റ്റിംഗ് സൗകര്യമുണ്ട്. ഇതനു പുറമെ, അബൂദാബിയിലെ പ്രധാന മാളുകളിലെല്ലാം പിസിആര്‍ ടെസ്റ്റിന് സൗകര്യം ലഭ്യമാണ്. ഗലേറിയ മാളിലും യാസ് മാളിലും അബൂദാബി സ്റ്റെം സെല്‍സ് സെന്ററിന്റെയും യാസ് ക്ലിനിക്ക് ഗ്രൂപ്പിന്റെയും ലാബുകള്‍ ലഭ്യമാണ്. മസ്ദര്‍ സിറ്റിയിലുള്ള ബയോജെനിക്‌സ് ലാബ് 24 മണിക്കൂറും പ്രവര്‍ത്തിക്കും. മുസഫ, മുഹമ്മദ് ബിന്‍ സിയാദ് സ്റ്റേഡിയം എന്നിവിടങ്ങളില്‍ കാപ്പിറ്റല്‍ ഹെല്‍ത്ത് സ്‌ക്രീനിംഗ് സെന്ററിന്റെ രണ്ട് പരിശോധനാ കേന്ദ്രങ്ങളുണ്ട്. മെഡിക്ലിനിക്കിന്റെ എയര്‍പോര്‍ട്ട് റോഡ്, അല്‍ നൂര്‍ ഹോസ്പിറ്റല്‍, ബനിയാസ്, മഹ്മൂറ, ഖലീഫ സിറ്റി, അല്‍ ഐനിലെ അല്‍ ജൗഹറ ഹോസ്പിറ്റല്‍, അല്‍ ഐന്‍ ഹോസ്പിറ്റല്‍ എന്നിവിടങ്ങളിലെ ലബോറട്ടറികളിലും ടെസ്റ്റിംഗ് സൗകര്യമുണ്ട്. ഇവയ്ക്കു പുറമെ, അബൂദാബിയിലെ ഏതാണ്ടെല്ലാ ആശുപത്രികളിലും പരിശോധന നടത്താനാവും.