ശരീരത്തെ അറിഞ്ഞ് വേണം വ്യായാമം; അമിതവ്യായാമം ഹൃദയാരോഗ്യത്തെ തകരാറിലാക്കുമോ?

പവർ സ്റ്റാർ പുനീത് രാജ്കുമാറിന്റെ മരണവാർത്ത ഞെട്ടലോടെയാണ് നാമെല്ലാം കേട്ടത്. 46 വയസ്സ് മാത്രം പ്രായമുള്ള പൂർണ ആരോഗ്യവാനായ ഇദ്ദേഹത്തിന് ഇത്തരത്തിൽ ഹൃദയാഘാതം ഉണ്ടായതിൻ്റെ സാധ്യത എല്ലാവരെയും അമ്പരപ്പെടുത്തി. ജിമ്മിൽ വ്യായാമം ചെയ്തുകൊണ്ടിരുന്ന അദ്ദേഹത്തിന് പെട്ടെന്ന് ശാരീരിക അസ്വാസ്ഥ്യം ഉണ്ടായതിനെ തുടർന്ന് അടിയന്തരാവസ്ഥയിൽ ആശുപത്രിയിൽ എത്തുമ്പോൾ, ശ്രീ. പുനീത് രാജ്കുമാർ പ്രതികരിക്കാത്ത അവസ്ഥയിലായിരുന്നുവെന്നും നേരത്തെ തന്നെ അദ്ദേഹത്തിന് ഹൃദയസ്തംഭനം സംഭവിച്ചു എന്ന വാർത്ത ആരോഗ്യ വിദഗ്ധർ വെളിപ്പെടുത്തി. വളരെ ആരോഗ്യകരമായ ജീവിതശൈലി നയിച്ചിരുന്ന ഫിറ്റ്‌നസ് പ്രേമിയായിരുന്ന അദ്ദേഹത്തിൻ്റെ ഇത്തരത്തിലൊരു വിയോഗം എല്ലാവരിലും ഉണ്ടാക്കിയ അമ്പരപ്പ് ഒട്ടും ചെറുതല്ല.



അദ്ദേഹത്തിൻറെ വ്യായാമ വർക്കൗട്ട് ശീലങ്ങളൊക്കെ സോഷ്യൽ മീഡിയയിൽ വലിയ ഹിറ്റായിരുന്നു. സ്വയമേയും മറ്റുള്ളവർക്കും പ്രചോദനമായ ആരോഗ്യകരമായ ഒരു ജീവിതശൈലി ആയിരുന്നു എല്ലായിപ്പോഴും അദ്ദേഹം പിന്തുടർന്നിരുന്നത്. എന്നിട്ടും അദ്ദേഹത്തിന് എന്തുകൊണ്ട് ഇത്തരത്തിലൊരവസ്ഥ വന്നു ചേർന്നു എന്ന് ആരാധകർ ഒന്നടങ്കം ചോദിക്കുന്നു. നടന്റെ അകാല വിയോഗത്തിന് പിന്നിലെ കാരണമായി ആരോപിക്കപ്പെടുന്ന കാരണങ്ങളിലൊന്ന് താരം സ്ഥിരമായി വർക്ക്ഔട്ടിൽ ഏർപ്പെട്ടിരുന്നുവെന്നും ഇത് അമിതമായ രീതിയിലായിരുന്നു എന്നൊക്കെയാണ്. അതുകൊണ്ടുതന്നെ നിർഭാഗ്യകരമാണെങ്കിലും, അമിതമായി വ്യായാമം ചെയ്യുന്നത് ചിലപ്പോൾ ഏതൊരാൾക്കും മാരകമായി മാറാൻ സാധ്യത ഉണ്ടെന്ന് വിശ്വസിക്കാൻ ഏതൊരാളും നിർബന്ധിതനാകുന്നു.

വ്യായാമം പരിധി വിട്ടാൽ



നമ്മുടെ ശരീരത്തിന് പതിവ് വ്യായാമങ്ങൾ വേണ്ടത് ഏറ്റവും അത്യാവശ്യമാണ്. രോഗങ്ങളെ അകറ്റി നിർത്താനും ആരോഗ്യകരമായ ജീവിതശൈലി നയിക്കാനുമായി ശാരീരിക വ്യായാമങ്ങൾ മുടങ്ങാതെ ചെയ്യേണ്ടതും നിർബന്ധമാണ്. ചിട്ടയായ വ്യായാമ ശീലം ജീവിതശൈലി നിയന്ത്രണത്തിന് സഹായിക്കുകയും നമ്മുടെ ശരീരഭാരം നിയന്ത്രിച്ചു നിർത്തുകയും ഹൃദയാരോഗ്യത്തിന് വരെ ഗുണം ചെയ്യുകയും ചെയ്യുന്നു. എന്നാൽ തന്നെയും ഇത് നമ്മുടെ ശരീരത്തെ വളരെയധികം ആയാസപ്പെടുത്തുന്ന കാര്യങ്ങളിലൊന്നാണ്. ഇത് അമിതമായി മാറുന്നത് ചിലപ്പോൾ നമുക്ക് തന്നെ ചെയ്യുന്നത് തിരിച്ചടിയായേക്കാം. അതുകൊണ്ടുതന്നെ ഇതിൻറെ ദോഷവശങ്ങളുണ്ടാകാനുള്ള സാധ്യതയെ മനസ്സിലാക്കേണ്ടത് പ്രധാനമാണ്.

പ്ലാങ്ക് ചെയ്യുമ്പോൾ ശ്രദ്ധിക്കാൻ ചില കാര്യങ്ങൾ

എന്താണ് അമിത വ്യായാമം



മതിയായ പരിശീലനം നേടാതെ തെറ്റായ രീതിയിൽ വ്യായാമം ചെയ്യുന്നത്, പെട്ടെന്നുള്ള ഫലങ്ങൾ നേടുന്നതിന് വ്യായാമം അനിയന്ത്രിതമായി വർദ്ധിപ്പിക്കുന്നത് തുടങ്ങിയ കാര്യങ്ങളൊക്കെ ഒരാളുടെ മസ്കുലോസ്കലെറ്റൽ അസ്ഥിഭാഗത്തിന് പരിക്കേൽക്കുന്നതിനും ഹൃദയം, രക്തസമ്മർദ്ദം എന്നിവയുൾപ്പെടെയുള്ള ഭാഗങ്ങളെ ദോഷകരമായി ബാധിക്കുന്നതിനും ഇടയാക്കും.

കൂടാതെ, വാമപ്പ് വ്യായാമങ്ങളുടെ അപര്യാപ്തതയും വ്യായാമത്തിന്റെ തെറ്റായ രൂപീകരണവും തീവ്രമായ വ്യായാമ ചര്യയുമായി ബന്ധപ്പെട്ട മേൽനോട്ടത്തിന്റെ അഭാവവും ഒക്കെ മുകളിൽ സൂചിപ്പിച്ച പ്രശ്നത്തെ കൂടുതൽ വഷളാക്കുന്നതാണ്. മസിൽ ബിൽഡപ്പിനും ഉടനടി ഫലങ്ങൾ ലഭിക്കാനുമായി നിങ്ങളുടെ ശരീരത്തെ ഒരു പരിധിയിലധികം ബുദ്ധിമുട്ടിക്കുന്നതാണ് അമിത വ്യായാമമായി കണക്കാക്കപ്പെടുന്നത്.

ഹൃദയാരോഗ്യത്തെ ബാധിക്കുമ്പോൾ



അമിതവ്യായാമത്തിന്റെ ഹ്രസ്വകാല അപകടസാധ്യതകളാണ് പേശിവേദന, ക്ഷീണം, മോശം മാനസികാവസ്ഥ, ഉറക്ക പ്രശ്നങ്ങൾ എന്നിവയൊക്കെ. എന്നാൽ കാലക്രമേണ ദീർഘകാലത്തിൽ ഇവയെല്ലാം നിങ്ങളുടെ ഹൃദയത്തിൻറെ ആരോഗ്യത്തെയും ശരീരത്തിന്റെ മറ്റ് കാര്യങ്ങളെയും ഏറ്റവും ദോഷകരമായി ബാധിച്ചേക്കാം. ആരോഗ്യവിദഗ്ധർ പറയുന്നതനുസരിച്ച്, അതിമ വ്യായാമം രക്തസമ്മർദ്ദം ഏതൊരാളിലും വർദ്ധിപ്പിക്കും. ഹൃദയ ധമനികളിൽ കൊളസ്ട്രോൾ ഫലകങ്ങളുടെ സാധ്യതകളുള്ള രോഗികളിൽ ഇത് ഹൃദയാഘാതത്തിന് കാരണമാകും.

ചില രോഗികൾക്ക് അമിത വ്യായാമം തൽക്ഷണം വെൻട്രിക്കുലാർ ആർറിഥ്മിയ എന്ന ഗുരുതരമായ ഹൃദയ താളത്തിൻ്റെ തകരാറുകൾ ഉണ്ടാക്കും. അതും ചിലപ്പോൾ പെട്ടെന്നുള്ള മരണത്തിന് വരെ കാരണമാകും എന്ന് പറയപ്പെടുന്നു. ഹൃദയധമനികളുടെ പ്രവർത്തനങ്ങളെ സ്വാധീനിക്കുന്നതിനു പുറമേ, തീവ്രമായ വ്യായാമങ്ങൾ ചെയ്യുന്നത് നിങ്ങളുടെ പ്രതിരോധ സംവിധാനത്തെ ദുർബലപ്പെടുത്തുകയും, അണുബാധകൾക്കും വൈറൽ രോഗങ്ങൾക്കും നിങ്ങളെ കൂടുതൽ സാധ്യതയുള്ളതാക്കുകയും ചെയ്യും. കൂടാതെ, ഇതുമൂലം ഉണ്ടാകാൻ സാധ്യതയുള്ള പരിക്കിന്റെ സാധ്യത വളരെ ഉയർന്നതാണ്.

സ്കിപ്പിംഗ് വെറുമൊരു വ്യായാമം മാത്രമല്ല; ഇത് വഴി കിട്ടും പല ഗുണങ്ങളും

നിങ്ങൾ അമിതമായ വർക്കൗട്ട് ചെയ്യുന്നുണ്ടോ എന്ന് എങ്ങനെ തിരിച്ചറിയാം



വ്യായാമം ജീവിതത്തിന്റെ ഒരു പ്രധാന ഭാഗമാണ്. അത് നിർത്തിവയ്ക്കാൻ ഒരു കാരണവും പറയാൻ കഴിയില്ല. എന്നാൽ നിങ്ങൾ ഹൃദ്രോഗം ഉള്ളവരോ അല്ലെങ്കിൽ വിട്ടുമാറാത്ത മറ്റു രോഗങ്ങൾ, പ്രമേഹം തുടങ്ങിയവ രോഗനിർണയം നടത്തിയിട്ടുണ്ടെങ്കിൽ, നിങ്ങളുടെ ശരീരത്തെ അമിതമായി ആയാസപ്പെടുത്തുന്നതിൽ നിന്നു വിട്ടു നിൽക്കേണ്ടതുണ്ട്. സഹിഷ്ണുതയും കൂടുതൽ ഉയർന്ന തീവ്രതയും ആവശ്യമുള്ള വ്യായാമങ്ങൾ ചെയ്യാൻ തുടങ്ങുന്നതിനു മുൻപ് ഓരോരുത്തരുടെയും ശരീരത്തിന് അനിവാര്യമായ ശാരീരിക വിലയിരുത്തൽ നടത്തേണ്ടതുണ്ട്. ഏതൊരാളും ചെയ്യുന്ന വർക്കൗട്ടുകൾ ശാസ്ത്രീയമായി രൂപകല്പന ചെയ്തതും ആരോഗ്യ പിന്തുണ ഉള്ളതും ആയിരിക്കണം. പെട്ടെന്ന് ഒരാവേശത്തിന് അല്ലെങ്കിൽ മത്സരബുദ്ധിയോ വെച്ചുകൊണ്ട് കർശനമായി വർദ്ധിപ്പിക്കേണ്ട ഒന്നല്ല വ്യായാമം എന്ന് തിരിച്ചറിയില്ല.

വ്യായാമം ചെയ്തുകൊണ്ടിരിക്കുന്ന ഒരാൾ അത് ഏത് അവസരത്തിൽ നിർത്തണമെന്ന് അറിയേണ്ടതും പ്രധാനമാണ്. ലക്ഷണങ്ങൾ ചിലപ്പോൾ വളരെ സൂക്ഷ്മമായിരിക്കാം. അതിന് ഉടനടി ചികിത്സയും വൈദ്യസഹായവും ആവശ്യമായി വന്നേക്കാം. വിദഗ്ധരുടെ അഭിപ്രായമനുസരിച്ച് വ്യായാമ വേളയിൽ, ശരീരത്തിലെ ഏതെങ്കിലും ഭാഗത്ത് എന്തെങ്കിലും വേദനയുണ്ടെങ്കിൽ, അമിതമായ ശ്വാസതടസ്സം, തലകറക്കം അല്ലെങ്കിൽ തളർച്ച, ഹൃദയമിടിപ്പ്, അമിതമായ വിയർപ്പ് അല്ലെങ്കിൽ ക്ഷീണം എന്നിവ അനുഭവപ്പെട്ടാൽ ഉടൻ വ്യായാമം നിർത്തിവയ്ക്കണം. പിന്നീട് പൂർണ്ണമായി ശരീരസുഖം അനുഭവപ്പെടാതെ ഒരിക്കലും ഒരു വ്യായാമ സെഷൻ ആരംഭിക്കരുത്.

നിങ്ങളുടെ ശരീരത്തെ അറിയുക

നിങ്ങളുടെ ശരീരത്തെ ശരിയായ രീതിയിൽ മനസ്സിലാക്കേണ്ടതും അത് പറയുന്നത് കേൾക്കുകയും ചെയ്യേണ്ടത് വളരെ പ്രധാനമാണ്. നിങ്ങൾ എന്തുകാര്യം ചെയ്യുമ്പോഴും എല്ലാം രീതിയിലും നിങ്ങളുടെ ശരീരം നിങ്ങളുമായി ആശയവിനിമയം നടത്താൻ ശ്രമിക്കുന്നുണ്ട്. നിങ്ങൾക്ക് ജലദോഷമോ നേരിയ പനിയോ അനുഭവപ്പെടുമ്പോൾ, നിങ്ങളുടെ രോഗപ്രതിരോധ ശേഷി ദുർബലമായതായി മാറിയിരിക്കുന്നുവെന്ന് ശരീരം നിങ്ങളോട് പറയുന്നു. നിങ്ങൾ ശരീരഭാരം വർദ്ധിക്കുമ്പോൾ ആവശ്യത്തിലധികം കൂടുതൽ കലോറികൾ നിങ്ങളുടെ ശരീരത്തിൽ വന്നെത്തുന്നതായി ശരീരം സൂചിപ്പിക്കുന്നു. അതല്ലെങ്കിൽ വിശദീകരിക്കാനാകാത്ത വിധം ശരീരഭാരം കുറയുകയാണെങ്കിൽ, നിങ്ങൾക്ക് ഹോർമോണൽ പ്രശ്നങ്ങൾ പോലുള്ളവ ഉണ്ടാകാനുള്ള സാധ്യതയുണ്ടെന്ന് അത് നിങ്ങളോട് പറയുന്നു.

ഇതുപോലെ തന്നെയാണ് വ്യായാമത്തിന്റെ കാര്യം വരുമ്പോഴും. വ്യായാമം ചെയ്യുമ്പോൾ നിങ്ങളുടെ ശരീരം എന്താണ് നിങ്ങളോട് പറയുന്നത് എന്ന് കൃത്യമായി കേൾക്കണം. നിങ്ങൾ കൂടുതൽ ആസ്വദിക്കുന്ന വ്യായാമങ്ങൾ ചെയ്യാൻ ശ്രദ്ധിക്കുക. നിങ്ങളുടെ ശരീരത്തിന് സമ്മർദ്ദമോ വേദനയോ അനുഭവപ്പെടുന്നുണ്ടെങ്കിൽ വീണ്ടും വ്യായാമം ചെയ്തു കൊണ്ട് അമിതമായി ആയാസപ്പെടരുത്. വ്യായാമത്തിന് ശേഷം, നിങ്ങൾക്ക് ഉന്മേഷം തോന്നുന്നുണ്ടോ, ക്ഷീണം തോന്നുന്നുണ്ടോ, ശക്തമാണോ, അതോ ബലഹീനതയാണോ അനുഭവപ്പെടുന്നത് എന്ന് സ്വയം ചോദിക്കുക. ഏതെങ്കിലും ചെറിയ ലക്ഷണങ്ങളും അടയാളങ്ങളും നിസ്സാരമാണെങ്കിൽ പോലും അത് അവഗണിക്കരുത്. നിങ്ങളുടെ മാനസികാരോഗ്യത്തിലും ശ്രദ്ധ കേന്ദ്രീകരിക്കാൻ ഓർമ്മിക്കുക.