ദോഹ: ഇസ്രായേല്‍ തങ്ങളുടെ ആണവ കേന്ദ്രങ്ങളില്‍ പരിശോധന നടത്താന്‍ അന്താരാഷ്ട്ര ആണവോര്‍ജ ഏജന്‍സിയെ അനുവദിക്കണമെന്ന് ഖത്തര്‍ ആവശ്യപ്പെട്ടു. ഓസ്ട്രിയയിലെ ഖത്തര്‍ അംബാസഡറും യുഎന്നിലെ സ്ഥിരം പ്രതിനിധിയുമായ സുല്‍ത്താന്‍ ബിന്‍ സലീം അല്‍ മന്‍സൂരിയാണ് ഏജന്‍സിയുടെ ബോര്‍ഡ് ഓഫ് ഗവേണേഴ്‌സ് യോഗത്തില്‍ ഈ ആവശ്യം ഉന്നയിച്ചത്. ഇസ്രായേലിലെ ആണവ റിയാക്ടറുകള്‍ പരിശോധകര്‍ക്കായി തുറന്നുകൊടുക്കണമെന്നും അദ്ദേഹം ആവശ്യപ്പെട്ടതായി ഖത്തര്‍ ന്യൂസ് ഏജന്‍സി അറിയിച്ചു.

​മിഡിലീസ്റ്റിനെ ആണവ മുക്തമാക്കണം

ഖത്തര്‍ ഉള്‍പ്പെടെയുള്ള എല്ലാ അറബ് രാജ്യങ്ങളും ആണവ നിര്‍വ്യാപന കരാറില്‍ ഒപ്പുവച്ചിട്ടുണ്ടെന്നും എന്നാല്‍ ഇസ്രായേല്‍ മാത്രമാണ് ഇതിന് അപവാദമെന്നും അദ്ദേഹം പറഞ്ഞു. മധ്യപൗരസ്ത്യ ദേശത്തെ ആണവ വിമുക്തമാക്കണം എന്നാവശ്യപ്പെടുന്ന അന്താരാഷ്ട്ര പ്രമേയങ്ങള്‍ അംഗീകരിക്കുന്ന കാര്യത്തിലും ഇതേ സഥിതിയാണ്. അറബ് രാജ്യങ്ങള്‍ അവ അംഗീകരിക്കാന്‍ തയ്യാറായപ്പോള്‍ ഇസ്രായേല്‍ അതില്‍ നിന്ന് വിട്ടുനില്‍ക്കുകയാണെന്നും അദ്ദേഹം കുറ്റപ്പെടുത്തി. ഇക്കാര്യത്തില്‍ അന്താരാഷ്ട്ര സമൂഹം ഇടപെടണം. ഇസ്രായേലിന്റെ ആണവ കേന്ദ്രങ്ങള്‍ അന്താരാഷ്ട്ര പരിശോധനയ്ക്കായി തുറന്നുകൊടുക്കുന്നതിന് ആവശ്യമായ ഇടപെടലുകള്‍ അവരുടെ ഭാഗത്തുനിന്നുണ്ടാവണമെന്നും അദ്ദേഹം ആവശ്യപ്പെട്ടു.

​ഇസ്രായേലിന്റെ പെരുമാറ്റം നിരുത്തരവാദപരം

ഫലസ്തീനികള്‍ക്കെതിരേ ഇസ്രായേല്‍ അനുവര്‍ത്തിക്കുന്ന നയങ്ങളും അന്താരാഷ്ട്ര മര്യാദകളുടെ ലംഘനവും ഫലസ്തീന്‍ ജനങ്ങളെ എല്ലാവിധ ആയുധങ്ങളും ഉപയോഗിച്ച് അടിച്ചമര്‍ത്താന്‍ നടത്തുന്ന ശ്രമങ്ങളും അവരുടെ നിരുത്തരവാദപരമായ പെരുമാറ്റത്തിന് തെളിവാണെന്ന് ഖത്തര്‍ പ്രതിനിധി ചൂണ്ടിക്കാട്ടി. അതിന് തെളിവാണ് അവസാനമായി ഗസയ്‌ക്കെതിരേ നടന്ന അതിക്രമങ്ങള്‍. ഇസ്രായേലിന്റെ ആക്രമണം ഒരിക്കലും ആനുപാതികമായിരുന്നില്ല. സിവിലിയന്‍മാരെ കൊന്നൊടുക്കുകയും സിവിലിയന്‍ കേന്ദ്രങ്ങള്‍ ബോംബിട്ട് തകര്‍ക്കുകയും ചെയ്യുന്ന രീതി ഉത്തരവാദിത്തത്തോടെ പെരുമാറുന്ന ഒരു രാഷ്ട്രത്തിന് ചേര്‍ന്നതല്ല. അതുകൊണ്ടാണ് ലോകത്തെമ്പാടും ഇസ്രായേലിനകത്തും ഇസ്രായേല്‍ വിരുദ്ധ വികാരം അലയടിച്ചത്. ഈ രീതിയില്‍ അന്താഷ്ട്ര മര്യാദകള്‍ ലംഘിക്കുകയും നിയമവാഴ്ച കാറ്റില്‍ പറത്തുകും നിരുത്തരവാദപരമായി ആയുധങ്ങള്‍ ഉപയോഗിക്കുകയും ചെയ്യുന്ന ഒരു രാജ്യം മറ്റുള്ളവര്‍ക്കെതിരേ ഭാവിയില്‍ ആണവായുധങ്ങള്‍ ഉപയോഗിക്കില്ല എന്നതിന് എന്താണ് ഉറപ്പെന്നും അദ്ദേഹം ചോദിച്ചു.

​സഹകരണത്തിന് ഐഎഇഎയ്ക്ക് നന്ദി

അതേസമയം, സമാധാനപരവും വികസനപരവുമായ ആവശ്യങ്ങള്‍ക്കായി ഖത്തര്‍ ഉള്‍പ്പെടെയുള്ള രാജ്യങ്ങള്‍ക്ക് ആണവ സാങ്കേതികവിദ്യയും അതുമായി ബന്ധപ്പെട്ട സഹായങ്ങളും കൈമാറുന്ന കാര്യത്തില്‍ അന്താരാഷ്ട്ര ആണവോര്‍ജ ഏജന്‍സി കാണിക്കുന്ന താല്‍പര്യത്തെ ഖത്തര്‍ പ്രതിനിധി യോഗത്തില്‍ പ്രകീര്‍ത്തിച്ചു. ഖത്തറിന്റ നിരവധി ദേശീയ പദ്ധതികളില്‍ ഖത്തര്‍ ആണവോര്‍ജ ഏജന്‍സിയുടെ സാങ്കേതിക സഹായവും സ്വീകരിക്കുന്നുണ്ട്. ഖത്തറിന്റെ വളര്‍ച്ചയില്‍ ഈ പിന്തുണ നിര്‍ണായകമാണെന്നും അദ്ദേഹം അറിയിച്ചു.