![ശിവസേന [ഷിൻഡെ വിഭാഗം]](https://www.udayakeralam.com/wp-content/uploads/2025/02/ss-360x180.jpg)
ഭൂട്ടാനെന്ന സ്വപ്‌നഭൂമി
യാത്രാപ്രേമിയായ ഏത് ഇന്ത്യക്കാരന്റെയും ബക്കറ്റ് ലിസ്റ്റിലുള്ള ഇടങ്ങളിലൊന്നായിരിക്കും ഭൂട്ടാന്‍. അതിമനോഹരമായ പ്രകൃതിയും ബുദ്ധമത സംസ്‌കാരവും വാഹനങ്ങളുടെ ഹോണ്‍ ശബ്ദവുമില്ലാത്ത ഭൂട്ടാനിലേക്കുള്ള റെയില്‍പാത, ടൂറിസം ലക്ഷ്യമിട്ടുള്ളതാണ്. വ്യാപാര-വ്യവസായ ലക്ഷ്യങ്ങളും ഇതിനുണ്ടെന്നാണ് അസമിലെ കൊക്രജാറിനെയും ഭൂട്ടാനിലെ ഗെലെഫുവിനെയും ബന്ധിപ്പിക്കുന്ന ഈ പദ്ധതിയെക്കുറിച്ച് വിശദീകരിക്കവേ ഇന്ത്യന്‍ വിദേശകാര്യ മന്ത്രി എസ് ജയശങ്കര്‍ പറഞ്ഞത്. ഏകദേശം 57.5 കിലോമീറ്റര്‍ ദൈര്‍ഘ്യം വരുന്ന റെയില്‍ പാതയാണ് യാഥാര്‍ത്ഥ്യമാവാന്‍ പോവുന്നത്.
Read: ഹൊസൂർ ഭാവിയുടെ ബാംഗ്ലൂർ? ബൊമ്മസാന്ദ്ര-ഹൊസൂർ മെട്രോ റെയിലിനെ കർണാടക ഭയക്കുന്നതിന് കാരണമുണ്ട്
ഇനി അസമിലേക്ക് ഒഴുകും സഞ്ചാരികള്‍
ഇന്ത്യ-ഭൂട്ടാന്‍ റെയില്‍പാത അസമിന് ലോക ടൂറിസം ഭൂപടത്തില്‍ അസമിന് വലിയ പ്രാധാന്യം നല്‍കുമെന്നത് പ്രസക്തമാണ്. ഒരു ഭാഗം ഹിമാലയവുമായും മറുഭാഗത്ത് ഇന്ത്യയുടെ അസം, അരുണാചല്‍ പ്രദേശ്, പശ്ചിമ ബംഗാള്‍, സിക്കിം എന്നീ നാല് ഇന്ത്യന്‍ സംസ്ഥാനങ്ങളുമായി അതിര്‍ത്തി പങ്കിടുന്ന രാജ്യമാണ് ഭൂട്ടാന്‍. അതുകൊണ്ടുതന്നെ ഇന്ത്യന്‍ സഞ്ചാരികളുടെ വിദേശയാത്രകളില്‍ പ്രഥമസ്ഥാനം തന്നെ ഭൂട്ടാനുണ്ട്.
റെയില്‍പാത ആരംഭിക്കുന്നത് അസമില്‍ നിന്നായതുകൊണ്ട് ഭൂട്ടാന്‍ കാണാന്‍ ആഗ്രഹിക്കുന്ന ഇന്ത്യക്കാരും, ഇന്ത്യയിലെത്തുന്ന വിദേശികളും വലിയ തോതില്‍ അസമില്‍ എത്തും. അസമിന്റെ സാമ്പത്തിക വളര്‍ച്ചയ്ക്ക് സഞ്ചാരികളുടെ ഒഴുക്ക് വലിയ സംഭാവനകള്‍ നല്‍കുമെന്നാണ് വിദേശകാര്യ മന്ത്രിയും പറയുന്നത്.
2026ല്‍ പദ്ധതി പൂര്‍ത്തിയാകുമെന്നാണ് പ്രതീക്ഷിക്കുന്നത്. മറ്റൊരു വസ്തുത, റെയില്‍പാത ഇരുരാജ്യങ്ങള്‍ക്കുമിടയിലെ ചരക്ക് കൈമാറ്റത്തിന് സഹായകമാവുമെന്നതാണ്. ഇക്കാലമത്രയും ചരക്ക്-സേവന കൈമാറ്റം റോഡുമാര്‍ഗമാണ് നടന്നിരുന്നത്. റോഡുകളെ മാത്രം ആശ്രയിച്ചുള്ള ചരക്ക് കൈമാറ്റം പലപ്പോഴും ഉയര്‍ന്ന ചെലവ്, കാലാവസ്ഥ വെല്ലുവിളികള്‍ പോലുള്ള പ്രതിസന്ധികള്‍ സൃഷ്ടിച്ചിട്ടുള്ളതാണ്. അതില്‍ നിന്നുള്ള മോചനം കൂടിയായിരിക്കും ഈ റെയില്‍പാത.
Read: ഹോങ്കോങ് മുതൽ ന്യൂയോർക്ക് വരെ: ലോകത്തിലെ ഏറ്റവും മികച്ച മെട്രോകൾ
18 വര്‍ഷം മുന്‍പ് ഉടലെടുത്ത ആശയം
കൃത്യമായി പറഞ്ഞാല്‍ 2005 ജനുവരി 25നാണ് ഈ റെയില്‍പാത സംബന്ധിച്ച് ഇന്ത്യയും ഭൂട്ടാനും തമ്മില്‍ ധാരണയിലെത്തിയത്. അന്നത്തെ ഇന്ത്യന്‍ പ്രധാനമന്ത്രി മന്‍മോഹന്‍ സിങ്ങും ഭൂട്ടാന്‍ രാജാവായ ട്രക്ക് ഗ്യാല്‍പോയും ഇതുസംബന്ധിച്ച ധാരണാപത്രത്തിലും ഒപ്പുവച്ചു. അസം, പശ്ചിമബംഗാള്‍ സംസ്ഥാനങ്ങളില്‍ നിന്ന് റെയില്‍പാത വികസിപ്പിക്കുന്നതിന്റെ സാധ്യതാപഠനം നടത്തുന്നതിനായിരുന്നു ധാരണ. ഭൂട്ടാന്‍ അതിര്‍ത്തിയിലെ ഏതെങ്കിലും ഒരു പട്ടണത്തിലേക്കായിരിക്കും പാത, ഇത്രയുമായിരുന്നു അന്നെടുത്ത തീരുമാനം. ശേഷം കഴിഞ്ഞവര്‍ഷമാണ് അസം-ഗെലെഫു റെയില്‍പാത എന്ന രീതിയിലേക്ക് തീരുമാനമായത്. 2022 ഡിസംബറിലായിരുന്നു അത്. ടൂറിസത്തിനൊപ്പം വ്യാപാര-വാണിജ്യ ബന്ധങ്ങള്‍ ദൃഢമാക്കുന്ന പദ്ധതിയെന്നാണ്
ഭൂട്ടാന്‍ വിദേശകാര്യ മന്ത്രി ഡോ. ടാണ്ടി ഡോര്‍ജി പറഞ്ഞത്.
2026 വരെ കാത്തിരിക്കാന്‍ കഴിയാത്തവര്‍ക്ക് ഈ മാര്‍ഗങ്ങള്‍ തിരഞ്ഞെടുക്കാം
വിസയില്ലാതെ ഇന്ത്യന്‍ പൗരന്‍മാര്‍ക്ക് സന്ദര്‍ശിക്കാന്‍ സാധിക്കുന്ന രാജ്യങ്ങളിലൊന്നാണ് ഭൂട്ടാന്‍. നിലവില്‍ റോഡ്, വിമാനം, റെയില്‍ മാര്‍ഗം ഭൂട്ടാനിലെത്താം. വിമാനത്തില്‍ പോകാന്‍ ആഗ്രഹിക്കുന്നവര്‍ക്ക് ന്യൂ ഡല്‍ഹി, കൊല്‍ക്കത്ത, ബാഗ്ഡോഗ്ര, ഗുവാഹത്തി എന്നിവിടങ്ങളില്‍ നിന്ന് ഭൂട്ടാന്‍ എയര്‍ലൈന്‍സ് വഴി യാത്ര ചെയ്യാം. ഇന്ത്യയിലെ വോട്ടര്‍ ഐഡി കാര്‍ഡുണ്ടെങ്കില്‍ പാസ്‌പോര്‍ട്ടും നിര്‍ബന്ധമില്ലെന്ന പ്രത്യേകതയുമുണ്ട്.
വിമാനമാര്‍ഗം
പാരോ അന്താരാഷ്ട്ര വിമാനത്താവളമാണ് ഇന്ത്യക്കാര്‍ക്ക് ഏറ്റവും അടുത്തുള്ള ഭൂട്ടാന്‍ എയര്‍പോര്‍ട്ട്. സമുദ്രനിരപ്പില്‍ നിന്ന് 7300 അടി ഉയരത്തിലുള്ള ഭൂട്ടാന്റെ പ്രവിശ്യയായ പാരോയിലാണ് ഈ വിമാനത്താവളമുള്ളത്. ഉയരം കേള്‍ക്കുമ്പോള്‍ തന്നെ റിസ്‌കും മനസിലായി കാണുമല്ലോ. പര്‍വത നിരയിലെ നദിതീരത്തുള്ള വിമാനത്താവളമാണിത്. ലോകത്ത് വിമാനം ലാന്‍ഡ് ചെയ്യാന്‍ റിസ്‌കുള്ള ഇടങ്ങളിലൊന്നായ ഇവിടെ വിമാനം ഇറക്കാന്‍ വെറും 20 പൈലറ്റുമാര്‍ക്ക് മാത്രമാണ് അനുമതിയുള്ളത്. വായുമാര്‍ഗം ഇന്ത്യയില്‍ നിന്ന് ഭൂട്ടാനിലെത്താവുളള ഏകമാര്‍ഗവും ഇതാണ്. പശ്ചിമബംഗാളിലെ സിലിഗുരിയിലുള്ള ബാഗ്ഡോഗ്ര വിമാനത്താവളത്തില്‍ നിന്ന് വേണം യാത്ര തിരിക്കാന്‍.
റോഡുമാര്‍ഗം
ബസ്, കാര്‍ യാത്രകള്‍ ഇതിനായി തിരഞ്ഞെടുക്കാം. ഭൂട്ടാനിലെ ഫ്യൂന്‍ഷോലിങ് നഗരത്തിലേക്കാണ് റോഡ് മാര്‍ഗമുള്ള യാത്രയിലൂടെ ആദ്യം പ്രവേശിക്കാനാവുക. കൊല്‍ക്കത്തയില്‍ നിന്നാണെങ്കില്‍ 18 മണിക്കൂര്‍ യാത്ര വേണ്ടിവരും. അതേസമയം വിമാന സര്‍വീസുള്ള സിലിഗുരിയില്‍ നിന്നാണ് യാത്ര പുറപ്പെടുന്നതെങ്കില്‍ 4 മണിക്കൂറില്‍ ഭൂട്ടാനിലെത്താം. റോഡു മാര്‍ഗമുള്ള യാത്രയില്‍ ആല്‍പൈന്‍ പര്‍വ്വതനിരകളും ഉഷ്ണമേഖലാ പ്രദേശങ്ങളും ആസ്വദിക്കാം എന്നതാണ് പ്രത്യേകത.
റെയില്‍യാത്ര
ഇന്ത്യയില്‍ നിന്ന് നേരിട്ട് ട്രെയിന്‍ സര്‍വീസ് ഇല്ലാത്തതിനാല്‍ അതിര്‍ത്തിയിലെ ഹസിമാര സ്റ്റേഷനില്‍ നിന്നോ ന്യൂ അലിപുര്‍ദുവാര്‍ സ്റ്റേഷനുകളില്‍ നിന്നോ ട്രെയിന്‍ കയറാം.
ഇന്ത്യയ്ക്ക് ചില പരസ്യമായ രഹസ്യ അജണ്ടകളും
ചൈനയുടെ വെല്ലുവിളികളെ തന്ത്രപൂര്‍വം മറികടക്കുകയെന്ന പരസ്യമായ രഹസ്യ അജണ്ടകൂടി ഇന്ത്യയുടെ അയല്‍പക്ക സഹകരണത്തിലുണ്ട്. ഐക്യ ചൈന എന്ന സ്വപ്‌ന സാക്ഷാല്‍ക്കാരത്തിനായി പ്രവര്‍ത്തിക്കുന്ന ചൈന, ഇന്ത്യന്‍ അതിര്‍ത്തികള്‍ കൈയേറും പോലെ തന്നെ മ്യാന്‍മാര്‍, നേപ്പാള്‍, ഭൂട്ടാനടക്കമുള്ള രാജ്യങ്ങള്‍ക്ക് മേലും കണ്ണു വച്ചിട്ടുള്ളതാണ്. ഭൂട്ടാന്‍ പിടിച്ചാല്‍ ചൈനയ്ക്ക് ഇന്ത്യയിലേക്ക് എത്താന്‍ എളുപ്പമാവും. അതുകൊണ്ട് തന്നെ ഭൂട്ടാന്റെ സംരക്ഷകര്‍ എന്ന സ്വയം നല്‍കിയ പദവിലാണ് ഇന്ത്യ-ഭൂട്ടാന്‍ ബന്ധം നിലനിര്‍ത്തിപ്പോരുന്നത്. ഭൂട്ടാനെതിരെയുള്ള ഏതൊരു അധിനിവേശവും ഇന്ത്യക്കെതിരായ അധിനിവേശമായി കണക്കാക്കുമെന്ന 1959 ആഗസ്റ്റ് 28ലെ മുന്‍ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ വാക്കുകളും ചേര്‍ത്തുവായിക്കണം. 1962ല്‍ ചൈന-ഇന്ത്യ സംഘര്‍ഷവേളയില്‍ ഭൂട്ടാനില്‍ ഇന്ത്യന്‍ സേനയെ വിന്യസിപ്പിക്കാന്‍ സാധിച്ചതും ഈ ബന്ധത്തിലൂടെയാണ്.
അതുപോലെത്തന്നെയാണ് റോഡു മാര്‍ഗം ബംഗ്ലാദേശ് തുറമുഖത്തെ ബന്ധിപ്പിക്കുന്നതിനായി ഇന്ത്യ നടത്തുന്ന നീക്കവും. ത്രിപുരയിലെ ഖോവായില്‍ നിന്ന് തുടങ്ങുന്ന എന്‍എച്ച് 208 ആണ് ബംഗ്ലാദേശിലെ ചിറ്റഗോംഗ് തുറമുഖത്തിലേക്ക് വികസിപ്പിക്കുന്നത്. ഇന്ത്യ, മ്യാന്‍മര്‍, തായ്ലന്‍ഡ് രാജ്യങ്ങളെ ബന്ധിപ്പിക്കുന്ന കൊല്‍ക്കത്ത-ബാങ്കോക്ക് ഹൈവേയും ഉടന്‍ യാഥാര്‍ത്ഥ്യമാവുമെന്നാണ് പ്രതീക്ഷിക്കുന്നത്.
![ശിവസേന [ഷിൻഡെ വിഭാഗം]](https://www.udayakeralam.com/wp-content/uploads/2025/02/ss-120x86.jpg)
