നര പ്രായമാകുമ്പോഴുള്ള സ്വഭാവിക മാറ്റമെങ്കിലും ഇത് താല്‍പര്യമില്ലാത്തവരാണ് ഭൂരിഭാഗവും. ഇതു പോലെ അകാല നര പലരേയും അലട്ടുന്ന പ്രശ്‌നവുമാണ്. ചെറുപ്പത്തിലേ മുടി നരയ്ക്കാന്‍ ശാരീരികവും മാനസികവുമായ പല പ്രശ്‌നങ്ങളുമുണ്ട്. ഇതില്‍ സ്‌ട്രെസ്, മുടിയിലെ കെമിക്കല്‍ പരീക്ഷണങ്ങള്‍, തലയില്‍ ഉപയോഗിയ്ക്കുന്ന വെള്ളം എന്നിങ്ങനെ തുടങ്ങി പലതും ഇതിന് കാരണമാകുന്നു. നര മറയ്ക്കാനായി കൃത്രിമ ഡൈകള്‍ വാങ്ങി ഉപയോഗിയ്ക്കുന്നവരാണ് ഭൂരിഭാഗം പേരും. എന്നാല്‍ ഇത് രോഗങ്ങള്‍ അടക്കം വരുത്തി വയ്ക്കുന്ന ഒന്നാണ്. ഇതിന് പരിഹാരമായി വീട്ടില്‍ തന്നെ തയ്യാറാക്കാവുന്ന സ്വാഭാവിക ഡൈകള്‍ ധാരാളമുണ്ട്. ഇത്തരത്തില്‍ ഹെന്ന ഡൈ നമുക്കു തയ്യാറാക്കാം.

​ഹെന്ന

ഹെന്ന പൊതുവേ ആരോഗ്യകരമായ ഒന്നാണ്. മുടി നര മറയ്ക്കാനും നരയ്ക്കാതിരിയ്ക്കാനും മുടിയ്ക്ക് കട്ടി ലഭിയ്ക്കാനുമെല്ലാം ഇത് ഉപയോഗിച്ചു വരുന്നു. തികച്ചും സ്വാഭാവിക വഴിയായതിനാല്‍ തന്നെ ദോഷങ്ങള്‍ ഒന്നും തന്നെ വരുന്നുമില്ല. മയിലാഞ്ചിപ്പൊടി തന്നെയാണ് ഇതിലെ പ്രധാന കൂട്ട്. ഇതിനൊപ്പം മുടിയ്ക്ക് ആരോഗ്യകരമായ ചില ചേരുവകള്‍ കൂടി ഇതില്‍ ചേര്‍ക്കുന്നു. നെല്ലിക്കാപ്പൊടി, തൈര്, നാരങ്ങാനീര്, കാപ്പിപ്പൊടി എന്നിവയാണ് ഇവ. ഇത് പ്രത്യേക ആനുപാതത്തില്‍ കലര്‍ത്തുക.

നെല്ലിക്ക

ശിരോചർമ്മം വൃത്തിയാക്കാനും പരിപോഷിപ്പിക്കാനും മുടിക്ക് തിളക്കം നൽകാനും നെല്ലിക്കയ്ക്ക് കഴിയും. ഇതിൽ അടങ്ങിയിരിക്കുന്ന ആന്റിഓക്‌സിഡന്റുകൾ പൊടി, മലിനീകരണം, പുക, ഹെയർ സ്റ്റൈലിംഗ് ഉപകരണങ്ങൾ എന്നിവ മൂലമുണ്ടാകുന്ന കേടുപാടുകളിൽ നിന്ന് മുടിയെ സംരക്ഷിക്കും. അകാല നരയിൽ നിന്ന് മുടിയെ സംരക്ഷിക്കുവാനും നെല്ലിക്കയ്ക്ക് കഴിയും.കൂടാതെ, താരൻ തടയാനും അത് മൂലമുണ്ടാകുന്ന ചൊറിച്ചിലും അകറ്റാൻ കഴിയുന്ന ആൻറി-ഇൻഫ്ലമേറ്ററി, ആൻറി ബാക്ടീരിയൽ ഗുണങ്ങൾ നെല്ലിക്കയിൽ അടങ്ങിയിട്ടുണ്ട്.

​കാപ്പി

കാപ്പി നമ്മുടെ കേശസംരക്ഷണ കാര്യത്തിൽ വളരെയധികം സഹായിക്കും എന്ന കാര്യം അറിയാമോ. തലമുടിക്ക് കാപ്പി വളരെ നല്ലതാണ്. ഇത് മുടി കൊഴിച്ചിൽ തടഞ്ഞു നിർത്താൻ സഹായിക്കുന്നു. മുടിയുടെ നിറം ഇരുണ്ടതും തിളക്കമുള്ളതുമാക്കി മാറ്റാനുള്ള ലളിതവും രാസ രഹിതവും ഏറ്റവും ഫലപ്രദവുമായ ഒരു വീട്ടുവൈദ്യമാണ് കാപ്പി.

​തൈര്

തൈര് കാൽസ്യത്തിന്റെ മികച്ച ഉറവിടം മാത്രമല്ല, ബി 5, ഡി തുടങ്ങിയ വിറ്റാമിനുകളും, സിങ്ക്, മഗ്നീഷ്യം, പൊട്ടാസ്യം തുടങ്ങിയ ധാതുക്കൾ, ഫാറ്റി ആസിഡുകൾ, പ്രോട്ടീനുകൾ എന്നിവയാലും സമ്പുഷ്ടമാണ്. ഇവ ഒരുമിച്ച് മുടി സംബന്ധമായ വിവിധ പ്രശ്നങ്ങൾ പരിഹരിക്കുന്നതിന് ഒന്നിലധികം വഴികളിൽ പ്രവർത്തിക്കുന്നു. തൈര് രോമകൂപങ്ങൾക്ക് ആഴത്തിലുള്ള പോഷണം നൽകുന്നു, ഇത് മുടിയെ ശക്തവും ആരോഗ്യകരവുമാക്കുന്നു.

​നാരങ്ങാ

നാരങ്ങാനീരും മുടിയ്ക്ക് നല്ലതാണ്. ഇതില്‍ ഉപയോഗിയ്ക്കുന്നതിന് മുന്‍പായി മുട്ട വെള്ളയോ ഒലീവ് ഓയിലോ ചേര്‍ക്കാം. ഇതും മുടിയുടെ ആരോഗ്യത്തിന് ഏറെ നല്ല ചേരുവകളാണ്. ഏഴ് സ്പൂണ്‍ ഹെന്ന പൗഡറില്‍ 3 സ്പൂണ്‍ നെല്ലിക്കാപ്പൊടി, കാല്‍ കപ്പ് തൈര്, പകുതി നാരങ്ങാനീര്, 1 ടീസ്പൂണ്‍ കാപ്പിപ്പൊടി മുട്ടയോ ഓയിലോ എന്നിവ വേണം. ഈ മിശ്രിതങ്ങള്‍ നല്ലതുപോലെ ചേര്‍ത്തിളക്കുക. പിന്നീട് ഇത് തേയില വെള്ളം തിളപ്പിച്ച് വാങ്ങി ഇതില്‍ ചേര്‍ത്തിളക്കി 2 മണിക്കൂര്‍ കഴിഞ്ഞ് മുടിയില്‍ പുരട്ടാം. ഇത് മുടി നരക്കു മാത്രമല്ല, മുടി വളരാനും ഗുണകരമാണ്.