അബുദാബി: ഇന്നു മുതല്‍ അബുദാബിയിലെ പൊതു ഇടങ്ങളില്‍ പ്രവേശനം ലഭിക്കണമെങ്കില്‍ അല്‍ ഹുസ്ന്‍ ആപ്പില്‍ ഗ്രീന്‍ പാസ് നിര്‍ബന്ധമാണ്. റെസ്റ്റൊറന്റുകള്‍, കഫേകള്‍, ഷോപ്പിംഗ് മാളുകള്‍, വലിയ സൂപ്പര്‍ മാര്‍ക്കറ്റുകള്‍, ജിമ്മുകള്‍, ഹോട്ടലുകള്‍, പാര്‍ക്കുകള്‍, ബീച്ചുകള്‍, സ്വിമ്മിംഗ് പൂളുകള്‍, വിനോദ കേന്ദ്രങ്ങള്‍, സിനിമാ തിയറ്ററുകള്‍, മ്യൂസിയങ്ങള്‍ തുടങ്ങിയ സ്ഥലങ്ങളില്‍ പ്രവേശിക്കുന്നതിനാണ് ഗ്രീന്‍ പാസ് നിര്‍ന്ധമാക്കിയിരിക്കുന്നത്. വാക്‌സിന്‍, പിസിആര്‍ ടെസ്റ്റ് വിവരങ്ങള്‍ക്ക് അനുസൃതമായിട്ടായിരിക്കും ആപ്പില്‍ ഗ്രീന്‍ പാസിന്റെ ലഭ്യത. അഥവാ മൊബൈലില്‍ അല്‍ ഹുസ്ന്‍ ആപ്പ് ഡൗണ്‍ലോഡ് ചെയ്യുകയും അതിലെ ഗ്രീന്‍ പാസ് കാണിക്കുകയും ചെയ്യാതെ ഇന്നു മുതല്‍ ഇവിടങ്ങളില്‍ പ്രവേശനം ലഭിക്കില്ല.

​കൊവിഡ് പ്രതിരോധത്തില്‍ യുഎഇയുടെ വജ്രായുധം

കൊവിഡ് പ്രതിരോധത്തില്‍ യുഎഇയുടെ ഏറ്റവും ശക്തമായ ആയുധമാണ് അല്‍ ഹുസ്ന്‍ ആപ്പ്. അല്‍ ഹുസ്ന്‍ എന്ന അറബി വാക്കിന്റെ അര്‍ഥം തന്നെ ശക്തമായ കോട്ടയെന്നാണ്. കൊവിഡ് രോഗികളെയും അവരുമായി സമ്പര്‍ക്കത്തിലേര്‍പ്പെട്ടവരെയും ആപ്പ് വഴി തിരിച്ചറിയാമെന്നതിനാല്‍ അവരുടെ ക്വാറന്റൈന്‍ ഉറപ്പുവരുത്താന്‍ ഇതിലൂടെ അധികൃതര്‍ക്ക് സാധിക്കും. ഒരാള്‍ കൊവിഡ് പോസിറ്റീവായാല്‍ അയാളുമായി നിശ്ചിത സമയത്തിനകം അടുത്ത സമ്പര്‍ക്കം പുലര്‍ത്തിയവര്‍ ആരൊക്കെയെന്ന് ഈ ആപ്പ് വഴി കണ്ടെത്താം. മൊബൈലിലെ ബ്ലൂടൂത്ത് വഴിയാണ് തൊട്ടടുത്ത മൊബൈലിലെ ആപ്പുമായി നമ്മുടെ മൊബൈലിലെ ആപ്പ് ബന്ധപ്പെടുന്നത്. ഒരാള്‍ വാക്‌സിനെടുത്തോ പിസിആര്‍ ടെസ്റ്റ് ഫലം നെഗറ്റീവാണോ തുടങ്ങിയ കാര്യങ്ങളും അല്‍ ഹുസ്ന്‍ ആപ്പ് വഴി അറിയാം. ഇവയ്ക്കു പുറമെയാണ് പുതിയ ഗ്രീന്‍ പാസ് സംവിധാനം കൂടി ആപ്പില്‍ ഉള്‍പ്പെടുത്തിയിരിക്കുന്നത്.

​ആപ്പില്‍ രജിസ്റ്റര്‍ ചെയ്യേണ്ടതെങ്ങനെ?

മറ്റെല്ലാ മൊബൈല്‍ ആപ്പുകളെയും പോലെ ആപ്പ്ള്‍ സ്റ്റോറില്‍ നിന്നോ ഗൂഗ്ള്‍ പ്ലേസ്റ്റോറില്‍ നിന്നോ അല്‍ ഹുസ്ന്‍ ആപ്പ് ഡൗണ്‍ലോഡ് ചെയ്‌തെടുക്കാം. അതിന്റെ സൈസ് 36 എംബി മാത്രമേ ഉള്ളൂ എന്നതിനാല്‍ ആപ്പ് ഡൗണ്‍ലോഡ് ചെയ്യാന്‍ കൂടുതല്‍ സമയം എടുക്കില്ല. ആപ്പ് ഡൗണ്‍ലോഡായാല്‍ എമിറേറ്റ് ഐഡി നമ്പര്‍ എന്റര്‍ ചെയ്യണം. യുഎഇയില്‍ റെസിഡന്‍സ് വിസ ഇല്ലാത്തയാളോ എമിറേറ്റ് ഐഡിക്കായി കാത്തിരിക്കുന്നയാളോ ആണെങ്കില്‍ യുഎഇയിലെത്തിയ വിസയിലെ യൂനിഫൈഡ് ഐഡി നമ്പര്‍ നല്‍കിയാല്‍ മതി. ദുബായില്‍ എത്തിയാല്‍ ഉടന്‍ ഏതെങ്കിലും മാളിലോ മറ്റോ പ്രവേശിക്കേണ്ട ആവശ്യമുണ്ടെങ്കില്‍ യുഎഇയില്‍ എത്തുന്നതിന് മുമ്പ് തന്നെ ആപ്പ് ഡൗണ്‍ലോഡ് ചെയ്യുന്നതാണ് നല്ലത്. എന്നാല്‍ നിങ്ങള്‍ യുഎഇയില്‍ ഓണ്‍ അറൈവല്‍ വിസയുള്ള ആളാണെങ്കില്‍ വിമാനത്താവളത്തില്‍ എത്തിയ ശേഷം പാസ്‌പോര്‍ട്ടില്‍ വിസ സ്റ്റാമ്പ് മാത്രമേ ലഭിക്കൂ. അതില്‍ യൂനിഫൈഡ് നമ്പര്‍ ഉണ്ടാവില്ല. അത് ഇല്ലാതെ അല്‍ ഹുസ്ന്‍ ആപ്പ് ആക്ടിവേറ്റ് ചെയ്യാനുമാവില്ല. അതിനാല്‍ എമിഗ്രേഷനില്‍ നിന്ന് യുഐഡി നമ്പര്‍ പ്രത്യേകം ചോദിച്ചു വാങ്ങണം.

​വിദേശത്ത് വച്ച് വാക്‌സിനെടുത്തവര്‍ എന്തു ചെയ്യും?

വിദേശത്തു നിന്ന് വാക്‌സിന്‍ എടുത്തവര്‍ക്ക് വാക്‌സിനേഷന്‍ സര്‍ട്ടിഫിക്കറ്റ് അല്‍ ഹുസ്ന്‍ ആപ്പില്‍ അപ് ലോഡ് ചെയ്യാനുള്ള സംവിധാനം ഇപ്പോഴില്ല. എന്നാല്‍ അടുത്തു തന്നെ ആപ്പില്‍ ഇതുമായി ബന്ധപ്പെട്ട് അപ്‌ഡേറ്റ് വരുമെന്നാണ് പ്രതീക്ഷിക്കുന്നത്. എന്നാലും ടൂറിസ്റ്റ് വിസയില്‍ എത്തിയവര്‍ക്കും പുതാതിയ രാജ്യത്തെത്തിയവര്‍ക്കും വാക്‌സിന്‍ സര്‍ട്ടിഫിക്കറ്റ് സ്‌കാന്‍ ചെയ്ത് അപ് ലോഡ് ചെയ്യാന്‍ കഴിഞ്ഞുവെന്ന് വരില്ല. ഇവര്‍ക്ക് ചെയ്യാനാവുക ഇക്കാര്യത്തില്‍ ഇളവ് നേടുകയെന്നതാണ്. അതിനായി അബൂദാബിയിലെ സേഹ സെന്ററിലോ മുബാദല ഹെല്‍ത്ത് വാക്‌സിന്‍ ക്ലിനിക്കിലോ പോവണം. അവിടെ നിന്ന് ആവശ്യമായ പരിശോധനകള്‍ക്കു ശേഷം ഇക്കാര്യത്തില്‍ തീരുമാനമെടുക്കും. ഇവിടെ നിന്ന് ഇളവ് അനുവദിച്ചു കൊണ്ടുള്ള ഒരു റിപ്പോര്‍ട്ട് ലഭിക്കും. ഇക്കാര്യം ആപ്പില്‍ വരുന്നതു വരെ ഈ റിപ്പോര്‍ട്ട് കാണിച്ചാല്‍ മതി.

​അല്‍ ഹുസ്ന്‍ ആപ്പില്ലാതെ അബൂദാബിയില്‍ കടക്കാനാവുമോ?

അബൂദാബി-ദുബായ് അതിര്‍ത്തിയില്‍ എത്തിയാല്‍ അല്‍ഹുസ്ന്‍ ആപ്പില്‍ വാക്‌സിനെടുത്തതിന്റെ സര്‍ട്ടിഫിക്കറ്റോ പിസിആര്‍ നെഗറ്റീവ് റിസല്‍ട്ടോ കാണിക്കാന്‍ വേണ്ടി ആവശ്യപ്പെടും. എന്തെങ്കിലും കാരണത്താല്‍ ആപ്പ് ഡൗണ്‍ ലോഡ് ചെയ്യാനോ രജിസ്റ്റര്‍ ചെയ്യാനോ പറ്റാത്തവര്‍ സര്‍ട്ടിഫിക്കറ്റിന്റെ പ്രിന്റ് ചെയ്ത കോപ്പി കൈയില്‍ കരുതേണ്ടിവരും. അതും ഇല്ലാത്ത പക്ഷം തൊട്ടടുത്ത ഡിപിഐ ടെസ്റ്റില്‍ സെന്ററില്‍ പോയി 50 ദിര്‍ഹം ചെലവില്‍ കൊവിഡ് ടെസ്റ്റ് നടത്തണം. റിസല്‍ട്ട് നെഗറ്റീവാണെങ്കില്‍ പ്രവേശനം അനുവദിക്കും.

​ആപ്പ് പണി മുടക്കിയാല്‍ എന്തു ചെയ്യണം?

അല്‍ ഹുസ്ന്‍ ആപ്പ് ശരിയായ രീതിയില്‍ പ്രവര്‍ത്തിക്കുന്നില്ലെന്ന ആക്ഷേപം ചിലപ്പോള്‍ ഉണ്ടാവാറുണ്ട്. ആശുപത്രികളില്‍ നിന്നുള്ള ടെസ്റ്റ്, വാക്‌സിന്‍ വിവരങ്ങള്‍ ആപ്പില്‍ അപ്‌ലോഡ് ചെയ്യുമ്പോഴുണ്ടാകുന്ന പ്രശ്‌നങ്ങള്‍ കാരണം ചിലപ്പോള്‍ അതുമായി ബന്ധപ്പെട്ട ശരിയായ വിവരങ്ങള്‍ നമ്മുടെ ആപ്പില്‍ ലഭിക്കാതിരിക്കുന്ന പ്രശ്‌നമുണ്ട്. എന്നാല്‍ ഇപ്പോള്‍ അത് വളരെ അപൂര്‍വമാണ്. രണ്ടാമത്തെ ഡോസ് വാക്‌സിന്‍ എടുത്താലുടന്‍ ആപ്പില്‍ പച്ച സ്റ്റാറ്റസ് വരും. 28 ദിവസം കഴിഞ്ഞാല്‍ E സ്റ്റാറ്റസും തെളിയും. ഇനി ആദ്യ ഡോസിന്റെ വിവരങ്ങള്‍ ആപ്പില്‍ കാണുകയും രണ്ടമത്തേത് കാണാതിരിക്കുകയും ചെയ്യുന്നുണ്ടെങ്കില്‍ ആപ്പ് ഡിലീറ്റ് ചെയ്ത ശേഷം ഒന്നുകൂടി ഇന്‍സ്റ്റാള്‍ ചെയ്താല്‍ മതിയാവും. എന്നിട്ടും ശരിയാവുന്നില്ലെങ്കില്‍ info@weqaya.aeയിലേക്ക് ഇ മെയില്‍ ചെയ്യാം. 800 11111 എന്ന നമ്പറിലേക്ക് വിളിച്ചാലും വിവരങ്ങള്‍ ലഭിക്കും.