മുഖത്തെ കരുവാളിപ്പും കറുത്ത പാടുകളുമെല്ലാം തന്നെ സൗന്ദര്യത്തെ ബാധിയ്ക്കുന്ന പ്രശ്‌നങ്ങളാണ്. ഇത് പലര്‍ക്കുമുള്ള പ്രശ്‌നങ്ങളുമാണ്. പ്രായമാകുമ്പോള്‍ ഇത്തരം പാടുകള്‍ സാധാരണയാണ്. ഇതല്ലാതെ ടാന്‍ പോലുള്ള കാരണങ്ങള്‍ കൊണ്ടുമുണ്ടാകാം. മുഖത്തെ കരുവാളിപ്പും കറുത്ത പാടുകളുമെല്ലാം മാറാന്‍ സഹായിക്കുന്ന ചില പ്രത്യേക വീട്ടുവൈദ്യങ്ങളുണ്ട്. ഇത്തരത്തില്‍ ഒന്ന് നമുക്ക് വീട്ടില്‍ തന്നെ തയ്യാറാക്കാം. തികച്ചും പ്രകൃതിദത്ത വൈദ്യമാണ് ഇത്. വീട്ടിലെ ചേരുവകള്‍ കൊണ്ട് തയ്യാറാക്കാവുന്ന ഒന്ന്. ഇതെങ്ങനെ തയ്യാറാക്കാമെന്നു നോക്കൂ.

ബീറ്റ്‌റൂട്ട്

ഇതിനായി വേണ്ടത് നാലു ചേരുവകളാണ്. ബീറ്റ്‌റൂട്ട് ആണ് പ്രധാന ചേരുവ. ഇതിനൊപ്പം വെളിച്ചെണ്ണ, മഞ്ഞള്‍, കറ്റാര്‍ വാഴ ജെല്‍ എന്നിവയും വേണം. ബീറ്റ്‌റൂട്ട് ഏറെ പോഷകങ്ങള്‍ അടങ്ങിയ ഒന്നാണ്. ഭക്ഷണമെന്ന നിലയില്‍ ഏറെ മികച്ചത്. ആരോഗ്യപരമായ ഏറെ ഗുണങ്ങള്‍ നല്‍കുന്ന ഒന്ന്. ചര്‍മത്തിനും സൗന്ദര്യപരമായ ഗുണങ്ങള്‍ നല്‍കുന്ന ഒന്നാണിത്. ഇത് കഴിയ്ക്കുന്നത് രക്തപ്രസാദമുണ്ടാകാന്‍, വിളര്‍ച്ച മാറാന്‍, നല്ല നിറത്തിന് എല്ലാം ഗുണകരമാണ്. ഹീമോഗ്ലോബിന്‍ ഉല്‍പാദനത്തിന് ഇതേറെ സഹായിക്കുകയും ചെയ്യുന്നു.

മഞ്ഞള്‍

മഞ്ഞള്‍ പുരാതന കാലം മുതല്‍ തന്നെ സൗന്ദര്യവര്‍ദ്ധക വഴികളില്‍ മുന്‍പന്തിയില്‍ നില്‍ക്കുന്ന ഒന്നാണ്. സൗന്ദര്യം വര്‍ദ്ധിപ്പിയ്ക്കാന്‍ മാത്രമല്ല, പല സൗന്ദര്യ, ചര്‍മപ്രശ്‌നങ്ങള്‍ക്കുമുള്ള നല്ലൊരു മരുന്നു കൂടിയാണ് മഞ്ഞള്‍. ഇതിന് ആന്റിഫംഗല്‍, ആന്റിബാക്ടീരിയല്‍ ഗുണങ്ങളുണ്ട്. ഇതുകൊണ്ടുതന്നെ മുഖക്കുരവടക്കമുള്ള പല ചര്‍മപ്രശ്‌നങ്ങള്‍ക്കും ഇത ഉത്തമ ഉപാധിയുമാണ്.ചര്‍മത്തിന് നിറം വര്‍ദ്ധിപ്പിയ്ക്കുമന്ന് അവകാശപ്പെട്ടിറങ്ങുന്ന മിക്കവാറും ക്രീമുകളില്‍ മഞ്ഞള്‍ പ്രധാന ചേരുവയാണ്.

വെളിച്ചെണ്ണ

നമ്മുടെ ചര്‍മ സംരക്ഷണത്തിന്‌ വളരെ എളുപ്പത്തിൽ ഉൾപ്പെടുത്താൻ കഴിയുന്ന ഒരു പ്രകൃതിയുടെ ചേരുവയുണ്ട് നമ്മുടെ കയ്യിൽ. നമ്മുടെ അടുക്കളയിലെ വെളിച്ചെണ്ണ തന്നെയാണത്. ഏറ്റവും ഫലപ്രദവും സുരക്ഷിതവുമാണ് വെളിച്ചെണ്ണയുടെ ഉപയോഗം. ആകർഷണീയമായ പോഷകങ്ങൾ നൽകികൊണ്ട് വാർദ്ധക്യ ലക്ഷണങ്ങൾക്കെതിരെ പോരാടാനും നിങ്ങളുടെ ചർമ്മത്തിന് യുവത്വം നൽകാനുമെല്ലാം ഇതിൻറെ ഉപയോഗം സഹായിക്കുന്നു. മുഖത്തെ അലര്‍ജിയ്ക്കും ചുളിവിനുമെല്ലാം ഇത് നല്ലൊരു പരിഹാരമാണ്.

​കറ്റാർ വാഴ

കറ്റാർ വാഴ, ആരോഗ്യത്തിനും ഭംഗിയ്ക്കും മുടി സംരക്ഷണത്തിനുമെല്ലാം തന്നെ ഒരുപോലെ ഉപകാരപ്രദമായ ഒന്നാണിത്.മുഖത്തെ ചുളിവുകള്‍ ഒഴിവാക്കാന്‍ പ്രകൃതി ദത്ത വസ്തുക്കളാണ് കൂടുതല്‍ സഹായിക്കുക. ഇത്തരത്തിലെ ഒന്നാണ് കറ്റാര്‍ വാഴ. ഇതിലെ വൈറ്റമിന്‍ ഇ തന്നെയാണ് പ്രധാന ഗുണം നല്‍കുന്നത്. ഇത് ചര്‍മ കോശങ്ങള്‍ക്ക് ഇറുക്കം നല്‍കുന്നു. ചര്‍മത്തില്‍ ചുളിവു വീഴാതെ കാക്കുന്നു. കറ്റാര്‍ വാഴ കൊണ്ടുണ്ടാകുന്ന ചില ഫേസ് പായ്ക്കുകള്‍ മുഖത്തെ ചുളിവുകള്‍ നീക്കാന്‍ ഏറെ നല്ലതാണ്.

​ഇതുണ്ടാക്കാന്‍

ഇതുണ്ടാക്കാന്‍ ബീറ്റ്‌റൂട്ട് കഴുകി ഇത് മിക്‌സിയില്‍ ഇട്ട് ജ്യൂസാക്കി എടുക്കുക. ഇത് അരിച്ചെടുക്കണം. ഈ ജ്യൂസ് വെള്ളം ചേര്‍ക്കാതെ വേണം, എടുക്കാന്‍. ഇത് ഒരു പാത്രത്തില്‍ ഒഴിച്ച് ചെറിയ തീയില്‍ ചൂടാക്കുക. ഇത് വററി വരുമ്പോള്‍ കാല്‍കപ്പ് വെളിച്ചെണ്ണ ചേര്‍ത്ത് നല്ലതു പോലെ ഇളക്കാം. മഞ്ഞള്‍പ്പൊടിയും ചേര്‍ത്ത് ഇളക്കുക. ഇത് ഏതാണ്ട് കറുപ്പു നിറത്തില്‍ ഒരുവിധം കട്ടിയാകുമ്പോള്‍ വാങ്ങി വയ്ക്കുക. ഇതില്‍ പിന്നീട് കറ്റാര്‍ വാഴ ജെല്‍ ചേര്‍ത്തിളക്കാം. ഇത് ഫ്രിഡ്ജില്‍ വച്ച് മുഖത്തു പുരട്ടാം. ദിവസവും രാത്രി കിടക്കാന്‍ നേരത്തു പുരട്ടി കിടക്കാം. അല്ലെങ്കില്‍ രാത്രിയില്‍ പുരട്ടി കുറേ കഴിയുമ്പോള്‍ കഴുകാം. മുഖത്തെ കരുവാളിപ്പ് ഉള്‍പ്പെടെയുള്ള പല പ്രശ്‌നങ്ങള്‍ക്കും ഇത് പരിഹാരമാണ്. Also read: തൈറോയ്ഡിന് മരുന്നില്ലാതെ മൂന്നു ചേരുവയില്‍ പരിഹാരം