കുഞ്ഞിനെ തേച്ച് കുളിപ്പിക്കാനുള്ള എണ്ണ ഇനി വീട്ടിലുണ്ടാക്കാം

ബേബി ഹെയർ ഓയിൽ തയ്യാറാക്കാം

ഇത് തയ്യാറാക്കി എടുക്കാൻ ആദ്യം തന്നെ അര കപ്പ് ശുദ്ധമായ വെളിച്ചെണ്ണ എടുക്കുക. ഉരുക്കുവെളിച്ചെണ്ണ എടുക്കുന്നതാണ് നല്ലത്. അതുപോലെ തന്നെ നല്ല ശുദ്ധമായ ഒലവ് ഓയിൽ ഒരു കാൽ കപ്പ് എടുക്കണം. ഇതിലേയ്ക്ക് നിങ്ങൾക്ക് വേണമെങ്കിൽ നല്ല മണത്തിന് ലാവണ്ടർ ഓയിൽ രണ്ട് തുള്ളി ചേർക്കാവുന്നതാണ്. ഇവ എല്ലാം കൂടെ മിക്‌സ് ചെയ്ത് നല്ലൊരു ബേബി ഹെയർ ഓയിൽ നിങ്ങൾക്ക് തയ്യാറാക്കി എടുക്കാൻ സാധിക്കും. ഈ എണ്ണ ദേഹത്തും തേയ്ക്കാവുന്നതാണ്.

ശ്രദ്ധിക്കേണ്ട കാര്യങ്ങൾ

ഈ എണ്ണ തയ്യാറാക്കാൻ നിങ്ങൾ വെളിച്ചെണ്ണയും അതുപോലെ തന്നെ ഒലീവ് ഓയിലും എടുക്കുമ്പോൾ അവ ശുദ്ധമായ എണ്ണകൾ തന്നെയാണ് എന്ന് ഉറപ്പ് വരുത്തണം. ഇതിനായി നിങ്ങൾക്ക് ഇതിൽചേർത്തിരിക്കുന്ന ചേരുവകൾ പരിശോധിക്കാവുന്നതാണ്. അല്ലെങ്കിൽ നിങ്ങൾക്ക് വെളിച്ചെണ്ണ വീട്ടിൽ തന്നെ തയ്യാറാക്കി എടുക്കാംനിങ്ങൾ ഉപയോഗിക്കുന്ന എണ്ണ ശുദ്ധമല്ലെങ്കിൽ അത് പലതരത്തിലുള്ള ചർമ്മ പ്രശ്‌നങ്ങൾ കുഞ്ഞിന് ഉണ്ടാക്കാൻ സാധ്യതയുണ്ട്. അതിനാൽ, നല്ലത് മാത്രം നോക്കി വാങ്ങാം.

ഡബിൾ ബോയിൽ

അതുപോലെ കുഞ്ഞിനെ എണ്ണ തേപ്പിക്കുമ്പോൾ ഡബിൾ ബോയിൽ ചെയ്ത എണ്ണ ഉപയോഗിക്കുന്നത് കുറച്ച് കൂടെ നല്ലതായിരിക്കും. പലരും എണ്ണ ഒരു പാത്രത്തിൽ എടുത്ത് നേരിട്ട് അടുപ്പിൽ വെച്ച് ചൂടാക്കുന്നത് കാണാം. എന്നാൽ, ഇത്തരത്തിൽ ചെയ്യുന്നത് എണ്ണയിൽ വിഷാംശം രൂപപ്പെടുന്നതിന് കാരണമാകും. അതിനാൽ, ഡബിൾ ബോയിൽ ചെയ്യുമ്പോൾ ആദ്യം ഒരു പാത്രം നിറയെ വെള്ളം ചൂടാക്കാൻ വെച്ച് അതിന്റെ മുകളിൽ മറ്റൊരു പാത്രം വെച്ച് അതിൽ എണ്ണ ഒഴിച്ച് ബോയിൽ ചെയ്ത് എടുക്കുക. ചൂട് അമിതമായി പോകാതിരിക്കാൻ എല്ലായ്‌പ്പോഴും ശ്രദ്ധിക്കണം.

സൂക്ഷിക്കുമ്പോൾ

നല്ല അടച്ചുറപ്പുള്ള കുപ്പിയിൽ ഈ ഓയിൽ സൂക്ഷിക്കാൻ ശ്രദ്ധിക്കണം. ഇല്ലെങ്കിൽ ഇത് പെട്ടെന്ന് ചീത്തയാകാൻ സാധ്യത കൂടുതലാണ്. അതുപോലെ തന്നെ കുപ്പി എടുക്കുമ്പോൾ പുതിയ കുപ്പി, അല്ലെങ്കിൽ നല്ല വൃത്തിയുള്ള ചില്ല് കുപ്പി എടുക്കുന്നതാണ് നല്ലത്. പ്ലാസ്റ്റിക്ക് പരമാവധി ഒഴിവാക്കാം. ഈർപ്പം തട്ടാത്ത സ്ഥലത്ത് നല്ല വൃത്തിയിൽ സൂക്ഷിച്ചാൽ ഇത് കുഞ്ഞുങ്ങൾക്ക് ഉപയോഗിക്കാൻ ബെസ്റ്റാണ്. എണ്ണ ഒഴിച്ച് വെക്കുന്ന കുപ്പി വെയിലത്ത് വെച്ച് നന്നായി ഉണക്കിയെടുക്കാനും ശ്രദ്ധിക്കുക.

കുഞ്ഞുങ്ങൾക്ക് പുരട്ടുമ്പോൾ

നമ്മൾ മുതിർന്നവർ ആയാലും ഏതെങ്കിലും പുതിയ ബ്യൂട്ടി പ്രോഡക്ട് ഉപയോഗിക്കുന്നതിന് മുൻപ് ഒരു പാച്ച് ടെസ്റ്റ് നടത്തും. കുറച്ച് എടുത്ത് കയ്യിൽ പുരട്ടി നോക്കും. അലർജി പ്രശ്‌നങ്ങൾ ഇല്ലെങ്കിൽ മാത്രമാണ് പിന്നീട് ഉപയോഗിക്കുക. അതുപോലെ തന്നെയാണ് കുഞ്ഞുങ്ങൾക്കും. പാച്ച് ടെസ്റ്റ് നടത്തിയതിന് ശേഷം മാത്രം ഉപയോഗിക്കാൻ ശ്രദ്ധിക്കുക. അതുപോലെ, ഇതിൽ ഏതെങ്കിലും ചേരുവ കുഞ്ഞുങ്ങൾക്ക് അലർജി ഉണ്ടെങ്കിൽ ഈ എണ്ണ ഉപയോഗിക്കരുത്.

കുഞ്ഞുങ്ങൾക്ക് ഈ ഓയിൽ പുരട്ടാൻ എടുക്കുമ്പോൾ കുറച്ച് കയ്യിൽ എടുത്ത് കൂട്ടിത്തിരുമ്മി, അത് തലയിലും മുടിയിലും തേച്ച് കൊടുത്ത് പതുക്കെ മസാജ് ചെയ്യാവുന്നതാണ്. ഇത്തരത്തിൽ തലയിൽ നന്നായി എണ്ണ തേച്ച് പിടിപ്പിച്ചതിന് ശേഷം അര മണിക്കൂർ വെക്കുക. അതിന് ശേഷം നിങ്ങൾക്ക് കുഞ്ഞിനെ കുളിപ്പിക്കാവുന്നതാണ്. എന്തെങ്കിലും അസുഖം കുഞ്ഞുങ്ങൾക്കുണ്ടെങ്കിൽ ഇത്തരം എണ്ണകൾ ഉപയോഗിക്കും മുൻപ് ഡോക്ടറുടെ ആഭിപ്രായം തേടുന്നതും വളരെ നല്ലതാണ്. ഇത് ആരോഗ്യ പ്രശ്‌നങ്ങൾ ഒഴിവാക്കാൻ സഹായിക്കും.